Christopher Watson lea okta máilmmi čeahpimusain báddet elliid ja eará luonddu jienaid.
Son lea máŋgalot jagi bargan earret eará máilmmi dovdoseamos luondduprográmmajođiheddjiin Sir David Attenboroughain.
Mannan vahkkoloahpa finai Anárjogas Kárášjogas. NRK beasai fárrui.
– Muhto maid dáppe?
– Dán jávrái bohtet olbmot oaggut jieŋa alde. Dan maid mun dagan dál lea «oaggut» jienaid jieŋa vuolde, muitala Watson.
Jietna johtá johtileappot čázis
Tuvraofelaš ja guovlludovdi lea bovren guokte rutni main leat sullii guokte mehtera gaska. Watsona veahkki Elin Már Øyen Vister ges luoitá hydrofuvnna, dahje čázevuole mikrofuvnna, goabbatge rudneráigái.
Guvtteš orru leamen dehálaš lohku go hydrofuvnnat maid galget guovtti mehtera čiekŋalassii.
Jietna johtá badjel njealje geardde johtileappot čázis go áimmus. Ja mearas leat buot eanemus jienat olles máilmmis, muitala Watson.
– Olbmot dadjet ahte mii orrut planehta alde man namma lea «Eana». Mun dajan ahte mii orrut planehta alde man namma lea «Mearra». Badjel 70 proseantta min planehtas lea mearra. Reasta leat dego sullot mat leat ihtán mearas, dadjá Watson.
Bargaba luđiin ja luonddujienaiguin
Anárjohkii lea boahtán juoigi ja dáiddára Ánde Somby mielde. Soai leaba ovdal ovttas ráhkadan skearru «Yoiking With the Winged Ones». Dalle báddiiga jienaid Lufuohtas.
Dán vuoru báddeba jienaid dáiddačájáhussii man jurddan lea čájehit njealje biekka skajá. Ja, go jietna johtá nu johtilit, de gullo maid bures.
– Buot min lihkastagat gullojit. Dá lea dat maid guolli gullá, dadjá Watson čippostettiin das jávrri alde.
Ja duohta lea, olbmo lihkastagat ja lávkkit gullojit erenoamáš bures hydrofuvnnain. Chris Watson bidjá Ánde Somby vázzit rutni birra, muhtimin lahka, nuppi vuoru gis dobbelis.
– Diet jienat leat dat buot čábbámusat maid mun ge dieđán - vázzit muohttagis, ja de gullat daid, dadjá Somby ja lasiha:
– Dál lea leamaš vejolašvuohta gullat muohttaga musihkka. Dat leamaš erenoamáš somá!
Ealga ja rávdnji
Jienaid maid báddeba áiguba atnit sierra dáiddačájáhusas Sámi Dáiddaguovddážis.
Doppe leat nuppi lanjas Somby njealje biekka čiehkagahpirat maid ieš lea gorron. Nuppi lanjas gis luohti ja luonddujienat.
– Mii báddiimet Anárjogas dakkár hui doajus rávnnji, ja dat doajus rávdnji lea dan ealgga luođi duogábealde, muitaleamen ahte dáppe lea johka maiddái lahka, muitala Somby.
Chris Watson oaivvilda ahte Ánde Somby jietna gullá lunddolaččat eanadahkii.
– Mun rehkenasttán Ándde jiena ja juoigama oassin lunddolaš máilmmis. Su jietna lea oassi eanadagas, ja danin leage hui buorre suinna bargat, dadjá Watson.