Buvttadit goastteerttega bohccobierggus juovlamárkaniidda

Finnmárku Boazu fitnodat fállá dál maiddái bohcco goastteerttegiid sávžža goastteerttegiid sadjái.

– Lea vuosttaš geardde go sin fitnodat bohccobierggus lea ráhkadan goasteerttegiid, čállá Finnmárkku Boazu fitnodaga beaivválaš jođiheaddji, Are Smuk Figved preassadieđáhusastis.

Goastteerttegiid lea vejolaš oastit muhtun Norgga borramušgávppiin.

Plassje fitnodagas maiddái goastteerttegat

Lulli-Trøndelága Plassje bohccobiergobuvttadeaddji, Rørosrein, gal lea baicce jagi 2015 rájes buvttadan bohccos goastteerttegiid.

– Mii čađaheimmet diibmá geahččalanbuvttadeami, ja leat ovttasbargan soames gávppiiguin . Dál mii vuordit maŋimus registreremiid ovdal go sáhttet álggahit vuovdima. Mis lea juo ovttasbargu gávppiin Norgga oaivegávpogis, Oslos, muitala Rørosrein beaivválaš jođiheaddji, Eva Nordfjell.

Sámi árbevierru

– Sápmelaččat han leat čađat goikadan bohccobierggu, ja dál mii ávkkástallat dán arbevieru ja leat buvttadišgoahtán goastteerttegiid bohccobierggus, dadjá Finnmárkku Boazu beaivválaš jođiheaddji, Are Smug Figved.

Sáhttá guorrat gos biergu lea vuolgán

Finnmárkku Boazu fitnodaga bohccobierggu sáhttá ollásit guorrat guđe ealus dat lea vuolgán, ja maiddái gos boazu lea guhton, dadjá Smuk Figved.

Guovdageainnu Thon hotealla gievkkanhoavda, Adrian Grunnfoss, rámida goastteerttegiid maid Finnmárkku Boazu lea buvttadan, ja lohka válljet bohcco erttegiid sávzza erttegiid sadjái.

Bures vuostáiváldet ođđa buktagiid

Nortura gulahallanráđđeaddi, Marthine Haugen Petersen, lohka illudahtti go ođđa biergobuktagat bohtet márkanii, ja sii gal sávvet bohccobierggu goastteerttegiid bures boahtima márkanii. Marthine Haugen Petersen gal ii loga bohcco goastteerttegiid makkárge gilvaleaddjin sidjiide.