Buot bealit leat dál buktán oainnudeaset Meahcceduopmustuolu dikkis Kárášjogas
Meahcceduopmostuolus leat dál čielggadeamen galget go sápmelaččat ieža oamastit eatnamiid vai stáda.
Guokte joavkku leat gáibidan oamasteami eatnamiidda.
Toralf Henriksen ovddasta Guttorm-joavkku, geat gáibidit ahte Kárášjoga eatnamat gullet dušše sápmelaččaide Kárášjogas. Son oaidná ahte Ohcejogas leat sápmelaččat báhcán unnitlogus dan maŋemuš 15 jagis, ja jáhkká dan geavvat Kárášjogas maid.
– Doppe leat láttánat dál eanetlogus, ja dat boahtá dáhpáhuvvat Kárášjogas maid. Sihkkarit ovtta 50-100 jagi geahčen mii sápmelaččat báhcit uhcitlohkui ja dalle mii vuoittáhallat. Danin lea dehálaš ahte mii oažžut dan sámi hálddašan ja oamastanvuoigatvuođaid nannejuvvot dál dikkiid bokte. Dát han leat min vuoigatvuođat, lohká Toralf Henriksen.
Kárášjoga sámiid searvi ja Kárášjoga gielda maid leat gáibidan oamasteami, muhto sii háliidit dán olles Kárášjoga álbmogii, ii dušše sápmelaččaide.
– Dat lea dan sivas go dieđusge dakkár lagas báikkis, de ii galgga sirret olbmuid. Dat lea hui dehálaš ahte oktavuođat bistet, ja ahte olbmot dovdet gullevašvuođa. Mun háliidan ahte buohkat geat ásset dáppe galget dovdat gullevašvuođa Kárášjohkii, lohká Ragnhild Lydia Nystad.
Maŋŋel Álttá-Guovdageainnu eanu dulvadeami vuostálastima guorahallagohte makkár rievttit sápmelaččain leat Finnmárkku eatnamiidda.
2019:s celkkii Finnmárkkukommišuvdna ahte Kárášjoga eatnamat gullet Kárášjoga álbmogii. Finnmárkkuopmodat FeFo eai miehtan dasa ja danin lea dát ášši dikkis.
Jan Olli ballá ahte sámi guovlu bieđgana jus celkojuvvo dikkis ahte sápmelaččat dat oamastit Kárášjoga.
– Jus dat lea dat mii lea vuođđun ahte dát lea sámi guovllu, ii dat leat báikki olbmuid geavaheami vuođul, muhto dat leat sámi guovllut. Dalle leat mii Finnmárkku sirren, leago sámi guovlu ja ii leat sámi guovlu. Mu oaidnu lea ahte oba Finnmárku lea sámi guovlu, lohká Jan Olli.
