På norsk: Drag svømmeklubb i Tysfjord gjør seg bemerket. Se gjerne TV-saken øverst i denne artikkelen, som er tekstet.
Unna bájkátjin, Ájluovtan Divtasvuonan, gånnå binnep gå 800 årru, la huj dåjmalasj vuodjamjuogos. Gå vuodjamæjvvalimijs båhti, de álu tjiebeda birra li medáljajs vallje.
Tjierggisvuohta lij Ájluovta-vuoddjij gaskan gå dán vahkkoloahpen ietjá juohkusij vuossti gilpustallin Polar-cupan Fuoskon.
Sihtá vuonarijka gilppusij
16-jagák Christel sihtá vuonarijka-gilppusij jåvsådit. Valla de hæhttu jåhtelabbo vuodjat gå majt åvddåla la vuodjam.
– Sidáv junior-NMaj. Dajnas hæhttuv ådå persåvnålasj rekårdåv nahkat.
Ja 13-jagák Kjerstina mielas soajttá liehket vehi låssåt vuodjat, ja rádnaj siegen hávsskudallá gå la vuodjamgilppusin.
– Låssåt la, ja suohtas la vuodjat ja nuppij siegen liehket, subtsas Kjerstin.
Gehtjadagán dárkkelis æjgáda rájddolahkkuj tjuodtju. Sidjij ålov merkaj mánájt dán láhkáj bessat tjuovvot.
– Suohtas la, ja dåbddu buorren mánáj siegen dán láhkáj liehket gæhttjamin gåktu Ájluokta vuorbástuvvá. Ájluokta l má unna bájkke moadda vuoddjij jus dalå stuoráp juohkusij buohtastahttá, tjielggi Tove Langmo guhti jådet dáv dåjmalasj juohkusav.
- Lågå aj:
– Lij låssåt
Juska Christel ittjij Vuonarijka gilppusij jåvsåda, de vuodjamjuogos sijddaj máhtsaj gietjav vuostasj sajij, ja aj ådå persåvnålasj rekårdajn.
– Ådå persåvnålasj rekårdåv nahkiv åttjudit. Vargga sekunda jåhtelabbo gå åvddåla.
– Lij låssåt, båssu Odin gå tjátjes bajás boahtá gilppusa maŋŋel.
- Lågå aj:
