NRK Meny
Normal

Ollu dušši bargu buollindustehusas

Dárbbašmeahttun buollinčuorvumat leat lassánan Norggas garrasit maŋimuš jagiid ja leat šaddan stuorra gollun ja váttisvuohtan, lohká Servvodatsihkkarvuođa Direktoráhta ossodatjođiheaddji Hans Kristian Madsen

Brannutrykning
Foto: Ann-Marita Eriksen / NRK

Dárbbašmeahttun buollinčuorvumat leat Norggas lassánan 30 proseanttain ja dát lea ollu, lohká Hans Kristian Madsen, Servvodatsihkkarvuođa Direktoráhtas.

Hans Kristian Madsen
Foto: Direktoratet for samfunnssikkerhet og beredskap

Kárášjoga gielddas leat dollačáskadeaddjit dássážii dán jagi 18 geardde duššiid šaddan vuolgit.

GULDAL: Dárbbašmeahttun buollinčuorvumat

100 000 ruvnna duššás

Diibmá lei lohku 15 olles jagis. Juohke vuolgga šaddá máksit birrasiid 6000 kruvnna. Dássážii lea diet 18 buollinčuorvuma šaddan gildii máksit badjelaš 100.000 kruvnna, buollinčáskadanjođiheaddji Alf Isaksena rehkega mielde.

Alf Isaksen
Foto: Eilif Aslaksen / NRK

Vaikko man divrras de šattaš, de eai sáhte biehttalit vuolgimis go buollin dieđihuvvo, lohká Isaksen.

Dárbbašmeahttun buollinčuorvumin lohkko go olbmot dieđihit buollima - vaikko ii leat buollimin. Dán logus ii leat dat go olbmot mieleavttus dájuhit ahte lea buollimin.

Visteeaiggáda ovddasfástádus

Stuorát visttiin manná dávjá buollindieđiheapmi njuolgga 110-guovddážii. Nu leat Kárášjogas ge šaddan vuolgit gieldda visttiide gos ii leat buollimin.

Ahte nie ii dáhpáhuva, gullá visteeaiggádii bearráigeahččat, lohká Servvodatsihkkarvuođa Direktoráhta ossodatjođiheaddji Hans Kristian Madsen. Visteeaiggáda ovddasvástádus dat lea ahte buollinjuman doaibmá nu go galgá.