Divrras ja nuoskkideaddji

Kárášjoga gielda ferte dál buollašamos áiggiid dálvet oljjuin liigelieggasa skáhput go gáiddusliggehat lea ovdal geasi rájes leamaš doaimmakeahttá.

Liggehaga fitnodat, Hexa Bioenergi AS:a teknihkalaš jođiheaddji, Gunnar Strømsvik, muitala siva manin sii gárte giddet liggehaga.

– Šattai stuorra hástalussan joatkit go geavaheddjiid máksu lei mealgat unnit go buvttadangolut. Dat njulgestaga ii lean gánnáhahttin, gárttai baicce vuolláibáza dáinna gávppiin, ja danin fertiimet ge giddet daid liggehagaid sihke Leavnnjas ja Kárášjogas čilge Srømsvik.

Eanaš báikkiin gáiddusliggehat

Norggas lea muđuid nuppelágan ovdáneapmi.

– Sullii 90 % Norgga gávpogiin ja čoahkkebáikkiin lea dál gáiddusliggehat. Dát váldá vuhtii birrasa buorebut go eará molssaeavttut. Orro leamen ahte dát lohku beare lassána, ja ahte eambbosat háliidit gáidduslieggasa, muitala Enova Petter Hersleth.

Ii leat árbmu go buollašat bohtet

Kárášjoga gieldda hálddašan-, doaimmahan- ja mađasatnojođiheaddji, Helge Nystad, mielas lea váigat go ná lea šaddan.

– Ii dat leat váigat dušše danin go máksá eambbo geavahit oljju, dat lea maid eambbo nuoskkideaddji go dat gáiddusliggehat livčče leamaš.

Váikko vel Nystad šálloša go oljolieggasii ferte dorvvastit, de ii sáhte goit gieldda dálui diktit gálbmot buollašin.

– Sihke min bealis, ja eisseváldiid bealis lea nu ahte eat galggašii geavahit oljju, muhto go olgun leat vihttalot buolašgráda, de juoga goit ferte geavahuvvot. Dál fertet beare iskat makkár eará molssaeavttut gávdnojit, loahpaha Nystad.