Gunn Kristin Kemi Granberg lea ollu jagiid leamaš buoidi, kilut lassánedje eanet ahte eanet maŋŋil go mánáid oaččui. Verret dilli šattai maŋŋil go nuppi máná oaččui, go dát mánná gozihii su ijaid, ja son de illá beasái vuoiŋŋastit. Ja go olmmoš unnán oađđá, de čuohcá dat millii ja diehtalasat maid rupmašii.
(Vuolemusas dán siiddus gulat sáddaga)
Eallidilli lei lossat go lei nu buoidi
Dál áiddobálii lea Gunn Kristin Granberg deavdán 39 jagi. Son ássá Álttás, muhto lea maid moadde jagi orron Hámmarfeasttas. Sus leat guokte máná, geat dál leaba juo oalle stuorrá. Iežas muitala rahčan olu justa dainna go maŋŋil go mánáid oaččui de mannagođii son veavttas bajás. Son njulgestaga buoidugođii. Ii lean somá leat dien dilis, muhto ii son moge nagadan ruoidnadit iežas. Buoiddit dagahišgohte sutnje olu váttuid, danne šaddagođii su eallin oalle lossadin.
Buoiddit dagahedje su buohcin
Son muitala ahte doavttir fertii suinna leat garas, son njulgestaga fertii ohcat beassat čuohpadeapmái unnidit čoavjjis. Čuohpadeamis galge de unnidit sus čoavjji nu ahte dokko ii galgan čáhkat nu ollu borramuš. Muhto ovdalgo dien čuohpadeapmái beasai, de fertii son ruoidnadit iežas logi proseantta veavttas.
Son fertii mannat Bådåddjui ohppui. Doppe galggai oahppat maid sáhttá borrat ja mo galgá juhkat.
Beasai čuohpadeapmái Bådåddjui
Issoras lohká lean vuolgit buohcevissui, go balai ahte ii lean nagadan ruoidnadit iežas dan mađi ahte sáhtte váldit su čuohpadeapmái. Illudahttin lohká lean go gulai ahte lei nagadin ruoidnadit logi proseantta veavttas. Nu beasai čuohpaduvvot, muhto geavai gal funet go ráige sus čoali, ja dat dagahii su hirbmat buohcin maŋŋá čuohpadeami. Fertejedje ođđasit fas rahpat su, ja buhtistit su siskálušaid.
Ruoidnadančuohpadeapmi livčče mannan bures, muhto de guske mo nu su čuollái ja dan dihte šadde váttut.
Lea unnon masá beliin
Dál illuda Gunn Kristin Kemi Granberg go veakta čájeha ahte son lea masa beali ovddeš veavttas dál gehppon. Son valáštallá dávjá. Masá juohke beaivve manná valáštallanstudioi lovttohallat veavttaid. Muđui vázzá son beatnagiinnis golbmii beaivái, go sihke son ieš, ja su beana illudeaba go váccašeaba tuvrraid geainnuid ja bálgái mielde.
Illuda geargat oahpuin ja álgit bargui
Stuorimus dáhpáhussan dál lea geargat oahppuin ja álgit bargat. Lohká šaddat somán beassat čájehit ahte son sáhttá bargat ja leahket earáid searvvis bargobáikkis. Ja soaitá vel geavvat nu ahte son deaivá dan stuorra ráhkisvuođa, dál go son lea seamma go earáge olbmot, lohká 39 jahkásaš nisu Gunn Kristin Kemi Granberg.
Dás gulat eanet dán áššis.