NRK Meny
Normal

Buođđobivdin jávkamin, danne čálii das girjji

Trond Are Anti lea almmustahttán váldofágadutkosis girjji. Das čállá son árbevirolaš luossabivdinvuogis, buođđumis. Jurdda dáinna lea bisuhit dán bivdinvuogi sániid, ja maiddái čilget mo dáinna bivdá.

Trond Are Anti

Trond Are Anti lea čállán váldofága dutkosis buođđobivddus, dál lea dan almmustahttán girjin.

Foto: Eilif Aslaksen / NRK

Deanučázádaga buođđobivdu lea viehka erenoamaš Sámis, ja dat lea bohciidahttán áiggiid čađa viehka rikkis buođđobivdosániid. Dát bivdu lea leamaš dehálaš ealáhus Deanuleagi ássiide ja lea ain odne dehálaš muhtimiidda. Luossabivdu lea maid dehálaš sámi kultuvrras ja erenoamážit Deanuleagi ássiid kulturvrras, čállá ČálliidLágádus. Dát lágádus leage almmustahttán Trond Are Anti girjji «Buođđu - Árbevirolaš sámi luossabivdovuohki» Girjji čállet heivet oahppogirjin allaskuvlla- ja universitehtadásis.

Trond Are Antti girji

Trond Are Antti girji

Foto: ČálliidLágádus

Čálli lea bajásšaddan guovllus gos buođđun lea árbevierru

Deatnolaš Trond Are Anti gearggai sámegiela váldofágain 2004. Váldofágadutkosis čálii son árbevirolaš luossabivdovuogi buođđuma sániin. Iežas lohká dán dahkan danne go dát luossabivdinvuohki orru dego nohkamin. Eai dán áigge šat bija nu buođuid detnui go ovdal.

Trond Are Anti lea deatnolaš, lea riegádan 1973, ja ássá Buolbmágis. Son lea bargan oahpaheaddjin, Sámeskuvllarektorin ja dál bargá son Deanugieldda bajásšaddánáššiid hoavdan.

Girjjiin áiggošii Anti doalahit buođđuma árbevirolaš sániid boahttevaš boalvvaide, go dál vuohttá son ahte eai šat nu ollugat bivdde buođuin.