Camila stoahká galbma áimmuin. Govven ja redigeren; Frode Grønmo.
Camila Emboava Lopes lohkagođii dán vahkus masteroahpu journalistihkas Sámi allaskuvllas Guovdageainnus.
– Mun bohten deike go mus lea miella vásihit juoga ođđasa, ja oahppat eambbo dan birra go Norga lea dohkkehan sápmelaččaid álgoálbmogin, čilge Camila.
Camila ii gula ieš álgoálbmogiidda, muhto sus leat máŋga olbmá geat gullet álgoálbmogiidda.
- Guldal:
30 lieggaceahkis 30 buolašceahkkái
Olles 60 ceahki erohusa temperatuvrras vásihii Camila go máktkoštii Brasilas Davvi-Norgii.
– Dá lea Paraíba sáttogáddi, Brasilas.
Dá čájeha Camila govaid go lei sáttogáttis ovdal go vulgii davas.
Foto: Frode Grønmo / NRK– Doppe lei 32 gitta 35 lieggaceahki mannan vahkkoloahpa.
Camila čilge ahte sutnje lea geahččalus dušše vuoigŋat go bođii muohtamáilbmái.
– Galbma áibmu lea mu mielas suohkadeappot go liegga áibmu, ja mun váibban jođaneappot go váccán dáppe.
Láhpi koaffara mas ledje bivut
Masteroahppostudeanta massii iežas koaffara jođidettiin, ja sutnje lei buolaš áibbas amas.
Lihkus oaččui luoikkasin bivuid Sámi allaskuvllas go Guovdageainnus lei lagabui 40 ceahki buolaš mánnodaga.
– Allaskuvla lea oastán lieggabiktasiid lonohallanstudeanttaid várás, muhto mis ii leat goassege ovdal boahtán studeantta nie guhkin, muitala allaskuvlla hálddahusbargi Lena Susanne Gaup.
«Now I´m ready to swim in the snow»
Allaskuvlla biktasiiguin lea Camila gearggus vuojadit muohttagis, ja lea hui ilus go oaččui luoikkasiin albma bivuid.
Dál go don leat nie bures gárvodan, de don gal njuiket obbasii ja vuojádat dego Lulli-Amerihká ábis?
– Juo, dál lean gearggus vuodjat obbasis, lohká Camila ja boagusta.
Biktasat mat sus ledje mielde, eai leat lahkage nu assái go skuvlla biktasat, muitaleastá vel son.
Sámi Allaskuvla lea oastán biktasiid lonohallanstudeanttaid várás.
Foto: Frode Grønmo / NRK
