Boazu darvánii asfalterenrusttegii ja duššai
Moatti beaivvi áigi darvánii boazu gaskaboddosaš asfalterenrusttega bázahusaide Giron girdišiljus.
Bohcco heakka eai nagodan gádjut ja Gabná čearru moaitá dál dáhpáhusa.
– Dát lea hui váivi, dadjá čearu ovdaolmmoš Lars-Marcus Kuhmunen SVT Sápmái (ruoŧagielat artihkkal).
Árabut dán geasi divodedje girdilangeainnu Girona girdišilljus ja dalle giddejedje girdišillju guovtti vahkkui.
Divodeami oktavuođas ceggejuvvui gaskaboddosaš asfalterenrusttet girdišilljui, ja moadde beaivve áigi fuomášedje bargit ahte boazu lei darvánan asfalterenrusttega bázahusaide.
Bargit dieđihedje iežaset bargoaddái ja Gabná čerrui dán birra.
Čearru geahččalii diimmá giđa juo bissehit divodeami go gielddas jerre sis oaivila áššis. Muhto čearu oaivilat eai váldon vuhtii, oaivvildit sii.
– Mii eat liikon dan jurdagii gal go 200 mehtera das eret lea min johtingeaidnu. Girdišilju oaččui ođđa asfáltta ja buori girdilangeainnu, muhto hárve jurddaša makkár váikkuhusat dáid daguin šaddet, lohká Kuhmunen.
Ellen Laurin, Swedavia várrepreassahoavda, geas lea ovddasvástádus Giruna girdišiljui, kommentere dáhpáhusa SVT Sápmái:
– Mii diehtit dáhpáhusa birra. Dat mii dál dáhpáhuvvá lea ahte mii dutkat dáhpáhusa ovttas vuollelágideaddjin. Mii leat bidjan johtui doaibmabijuid ja áigut dađistaga bidjat johtui doaibmabijuid eastadan dihtii ahte sullasaš dáhpáhus fas geavvá. Mii šállošat dieđusge dan mii dáhpáhuvai - dat lea hui váivves dáhpáhus, son čállá.
Ii leat vel mearriduvvon mo čearru áigu čuovvolit ášši.
– Mii fertet oaidnit mo mii bargat viidáseappot dáinna áššiin, mii eat leat vel mearridan maidege, loahpaha Lars-Marcus Kuhmunen.
