NRK Meny
Normal

Boazosápmelaš: – Diet gal dukkoraddet Nordfjellas

Sombbi Niga mielas eiseválddit stohket go báhčet ovtta ja ovtta gotti Nordfjellas. Son ávžžuha goddeealu bidjat gárdái ja bargat dán albma ládje.

Sombbi Niga motasje

Guokte báhččon gotti Nordfjellas. Čiehkagovas: Sombbi Niga

Movt du mielas orro dat go báhčet ovtta gotti hávális?

– Diet gal dukkoraddet, vástida Niillas A. Somby dahje Sombbi Niga Deanus eret, gii lea ovdal bargan bohccuiguin.

Stáda ámmátbivdit leat báhčán 19 gotti vuosttaš beivviid Nordfjellas, Lulli-Norggas, ja mihttun lea jávkadit 1500 ealli ovdal giđa.

– Davviriikkain gávdnojit olbmot geat máhttet ja dihtet bohcco luonddu. Sii livčče sáhttit ráhkadastit gárddi. Eai ge sii goit livčče ádjánan eará golbma vahkku dáinna. Gárddi cegget ja dasa goddit olles ealu, jus juo eallu galggaš jávkkaduvvot, dadjá son.

– Máŋggas dadjet dan seammá

Biepmobearráigeahču váldokantuvrra CWD-dávdda koordináhtor Hallgeir Herikstad biehttala ahte sii stohket Nordfjellas, muhto mieđiha ahte ii leat vuosttaš hávve son gullá diekkár čuoččuhusaid.

– Máŋggas dadjet dan seammá go son, vástida Herikstad.

Son čilge ahte goddeealu njuovvan lea juhkkon golmma váldooassái.

Álggos viiddidit dábálaš goddeelliid bivddu, nuppe vuorus ges virgáda stáda ámmát bivdiid, ja loahpaloahpalaččat lea plána vuojehit gottiid gárdái ja goddit elliid nugo boazodoalus dahket.

Herikstad čilge ahte vaikko plána lea cegget gárddi, de sii eai beroš iskat elliid eallinaga.

– Go mis ii leat makkárge vuohki iskat ealli gottiid, ja go mihttun lea bissehit dávdda, de mii fertet meannudit olles ealu dego juohke gottis livččii dát vuoiŋŋašnjoammudávda, dadjá son.

CWD fuomášan ealggas ja ruksesgottis

Šibitdoavtterinstituhtta gávnnai CWD-dávdda ealgaronus Selbus, Lulli-Troandimis diibmá miessemánu 12. beaivve.  

Movt áigbehtet bissehit dávdda maid lehpet fuomášan ealggas ja ruksesgottis?

– CWD-dávda maid mii leat fuomášan ealggas ja ruksesgottis lea earálágan go dat maid leat gávdnán gottis. Fuođđoeallit main leat fuomášan dávdda ledje boares eallit, ja dain ii lean leavvan dávda rávssáide. Gottiin ges leat gávdnán dávdda nuorra elliin ja dain lei dávda leavvan rávssáide, čilge Herikstad.