Boazodoalli lágasta orohagainnis lágamannerievttis

Odne álggii Davvi-Hålogalándda lágamanneriekti gieđahallat ášši Tromssas. Diggi bistá golbma beaivvi.

Tor Mikkel Eira čujuha iežas advokáhttii go NRK Sápmi háliida hupmat suinna. Eira advokáhtta Per A. Amundsen deattuha ahte sin mielas lea diggegotti duopmu riekta.

– Mii oaivvildit ahte orohatstivra ii leat soabadan buot siidaosiiguin movt sii plánejit unnidit boazologu. Go ii leat soahpamuš, de fertejit siidaoasit unnidit boazologu seammá stuora proseanttain. Dat ii leat dahkkon dán áššis, ja min mielas lea diggegotti duopmu riektá ja berre doalahuvvot lágamannerievttis maid.

Orohaga 14, Spiertagáissá, ovddasteaba advokáhta John Jonassen ja advokáhta Knut H. Hurum.

– Mis leat áššebáhpirat ja protokollat mat duođaštit ahte boazologu unnidan proseassa lea čađahuvvon riekta, lohka Jonassen.

– De gal orohat reastaluvvá

Spiertagáissá orohaga stivraovdaolmmoš Per John Anti čilgii iežas beali lágamannerievttis odne. Son ballá orohaga boahtteáiggis jus Eira vuoitá fas.

– Jus Eira oažžu buhtadusa maid gáibida, de reastaluvvá orohat, dajai orohaga stivrra ovdaolmmoš Per John Anti dikkis.

Kárášjoga boazosápmelaš Tor Mikkel Eira gáibida 800 000 ruvnno ovddas buhtadusa orohagas, go lea šaddan unnidit boazologu. Diggegottis gáibidii 650 000 ruvnno, muhto ii ožžon eará 195 000 ruvnno ovddas buhtadusa.

Eira advokáhta Per Amundsen ii čuovvul čuoččuhusa.

– Orohaga stivraovdaolbmos lea vejolaš soabadit Eirain unnibut supmi nugo buot diggeáššiin lea, ja dan son sáhtii dahkat maid diggerievttis, dadjá Amundsen.

Duvdet ovddasvástádusa eret

Dá ii leat vuosttaš diggi boazologu heivehan áššiin. Gieskat lágastii Per Nils Ottar Anti iežas orohaga vuostá lágamannerievttis sullasaš áššin maid son vuittii.

Norgga Boazosápmelaččaid riikasearvvi jođiheaddji Ellinor Marita Jåma oaivvilda lea váidalahtti go boazodoallit šaddet boazologu áššiid čoavdit dikkiin.

– Stáda ii leat láhčán arenaid gos boazodoallit sáhttet gulahallat ja čoavdit riidoáššiid siskkáldasat. Ja dainna lágiin duvdá stáda ovddasvástádusa eret.

Son oaivvilda dikkiin leat váikkuhusat.

– Das leat váikkuhusat daidda siskkáldas bargguide dain orohagain. Muhto go dat lea daddjon, de leat eanas orohagain dohkkehuvvon boazolohku ja dál lea boazolohku Finnmárkkus dan dásis maid stáda lea mearridan.