Rávn-Ásllat Piera Jovnna lea orohaga 14A – Spiertagáissá orohatovdaolmmoš, ja Norgga Boazosápmelaččaid Riikkasearvvi nubbiovdaolmmoš, dat váiddi stáhta, ja gáibidii ahte boranávdebuhtadusaid mearrádusat galge duššindahkkojuvvot.
Oavvildit stáhta rihkkon njuolggadusaid
Rávn-Ásllat Piera Jovnna advokáhta guovttos Johanne Eide Joyce ja Karianne Aamdal Lundgaard ákkastalaiga iežaska loahppasártnis Oslo diggegottis ahte boranávdebuhtadusaid meannudeamis lea Birasdirektoráhtta rihkkon sihke áššemeannudannjuolggadusaid ja buhtadusnjuolggadusaid.
Advokáhta guovttos gáibádus lei ahte Oslo diggegoddi duššindahká mearrádusaid, ja ahte Anti galggai oažžut dievas boranávdebuhtadusa.
Máhcahii cuiggodemiid
Ráđđehusadvokáhtta, Stein-Erik Jahr Dahl, gal máhcahii Anti cuiggodemiid, ja čilgii iežas loahppasártnis ahte sii leat čuvvon buot njuolggadusaid, ja su gáibádus diggái lei ahte Oslo diggegoddi galggai hilgut Anti gáibádusaid.
Mearridedje bajimus boazologu
Piera Jovnna Anti muitala ahte sin orohaga siiddain jagi 2008/2009 lei hui alla boazolohku, ja sii mearridedje dalle bajimus boazologu juohke siidda nammii.
Dan sii dahke go sihke resursarehketdoallu ja boazodoallodieđáhus duođaštii ahte sis ledje ollu táhpat.
Vahágat eai unnon
Vaikko orohagas geahpidedje boazologu mearriduvvon dássái, de eai unnon vahágat. Anti muitala ahte sii čoahkkinaste dalá Luondduhálddašandirektoráhtain, Romssa ja Finnmárkku fylkkamánni ámmáhiiguin, boraspirelávdegottiiguin ja stáhta luonddubearráigeahčuin, ja bivde veahki ja rávvagiid sis.
Anti dadjá ahte boraspirevahágat lassánedje seammás go boazologu vuolideapmi dagahii unnit bohccuid maid sii sáhte vuovdit.
Nuorat eaiggádat moaráskedje
Rávn-Ásllat Piera Jovnna muitala ahte orohaga nuorra boazoeaiggádat dat moaráskedje go eai ožžon boranávdebuhtadusaid mat dávistedje dan logu maid boranávddit duođaid godde Spiertagáissá orohaga siiddaid ealuin.
NBR veahkkin
Norgga Boazosápmelaččaid Riikkasearvvi stivralahttu, Torstein Appfjell lei veahkkin Rávn-Ásllat Piera Jovnna ášši go Oslo diggegoddi árabut dán vahku loahpahii ášši mas boazoeaiggát gáibidii diggegotti hilgut eisseválddiid boranávdebuhtadusa mearrádusaid.
Duopmu lea vuordimis guovtti vahku geahčen. Ráđđehusadvokáhtta, Stein-Erik Jahr Dahl, ii dáhtton kommenteret ášši, ovdal go duopmu celkojuvvo.