Boazodoalloláhkaárvalus gulaskuddamis
Sámedikkis sáddejedje ođđa boazodoalloláhkaárvalusa gulaskuddamii ja áigemearri dasa lei ođđajagimánu 5. beaivve dán jagi. Ollugat leat buktán cealkámušaid dán láhkaárvalussii, muhto buot gielddat, fylkkagielddat ja stáhtahálddašeaddjit mat leat vástidan, čállet sámediggái ahte eai dáhto makkárge oaiviliid buktit dien boazodoalloláhka árvalussii. Go Eanadoallo- ja biebmodepartemeantta, ráđđehus dahje Stuorradikkis bivdet cealkámušaid dálá boazodoalloláhka rievdadeapmái, de lohket sin láhkaárvalusaid áigot buktit. Nu čállet sámediggái. Sámediggi ovttas Norgga Boazosápmelaččaid Riikkaservviin nammadedje 2018:s Boazodoalloláhkalávdegotti, mas de lei bargun geahčadit mo dálá lága berre rievdadit. Lávdegoddi almmuhii iežaset árvalusa čakčamánus diibmá ja muhtin vahkuid maŋŋá bijai Sámediggi árvalusa gulaskuddamii. - Mihttu barggus lea nannet ja ja suddjet boazodoalu boahtteáiggis, sihke ealáhusa, árbemáhttu, dássearvu ja kultuvra, logai Boazodoalloláhkalávdegotti jođiheaddji Øyvind Ravna mannan čavčča. Boazodoalloláhkaárvalus galgá Sámedikke dievasčoahkkimii áššin njukčamánus.