Hopp til innhold

Korte nyheter

  • Ságastallet vaššiságaid birra

    Vaššiságat ja rasisma neahtas sápmelaččaid vuostá lea Suomas leamaš olu sáhkan vássán áiggiin. Ášši lea bohciidahttán fuola sámemánáin- ja nuorain, ahte mo dát vaššiságat váikkuhit sin boahttevuhtii.

    Nuorra, Rosa-Máren Juuso, Gárasavvonis, lea okta dain guhte lea neahtas oaidnán vaššiságaid sámiid birra.

    – Dat hupmet ilgadit sápmelaččaid birra. Boahtá čoavjái dakkár ilgadis dovdu go lohká daid. Sáhtán gal lohkat, ahte mun lean oaidnán nieguidnai dan birra, dakkár heajos nieguid, lohká son.

    Suoma Sámedikki ovddeš ságadoalli, Tiina Sanila-Aikio, lea fuolas das go sámenuorat galget vásihit neahtas vaššiságaid ja rasismma.

    – Dálá čálašeamis geavahit hui garra giellagovaid. Dát lea hui váivi ja dainna leat stuorra váikkuhusat min mánáide ja nuoraide, sin dorvvolašvuođa dovdui, lohká Sanila-Aikio Yle sámi ođđasiidda.

    Tiina Sanila-Aikio i møtesal i Utsjok
    Foto: Nils Henrik Måsø / NRK
  • Biilalihkohisvuođat Nordlánddas

    Nordlánddas leat vássán jándora leamaš máŋga biilalihkohisvuođa.

    Politiijat rávvejit olbmuid vuodjit várrugasat.

    – Miehtá Nordlándda lea gálja ja olbmot berrejit heivehit leavttu siivvu mielde go leat biila vuodjimin, lohká Nordlándda politiijaid operašuvdna guovddáža jođiheaddji, Ivar Bo Nilsson.

    Earret eará Skániin lea leamaš biilabárti.

  • Politiijat eai áiggo dutkat guovžabáhčima

    Čakčamánus báhččui guovža Snåase gielddas máttasámis. Stáhta luonddubearráigeahčču váiddii báhčima politiijaide, go balahedje ahte geat nu ledje geavahan sievtti mainna oasuhedje guovžža dan báikái gos báhččui.

    Politiijat leat guorahallan ášši, ja leat gávnnahan ahte sis leat menddo unnán duođaštusat áššis, ja nu fertejit loahpahit guorahallamiid.

    – Sii gal leat duhtavačča go dát šattai boađusin politiijaid guorahallamis. Dát ášši lea leamaš noađđin daidda geat leat leamaš mielde gieldda bivdojoavkkus, dovddaha bivdojoavkku jođiheaddji Kåre Johannes Selliås NRK:ii.

    Stáhta luonddubearráigeahčču lea árvvoštallamin galget go sii guoddalit politiijaid mearrádusa vai eai.