NRK Meny
Normal

Blacksheeps lihkostuvai Troanddimis

Unjárgga joavku Blacksheeps dagai buori barggu Nuoraid kulturdeaivvadeami loahppadoaluin Troanddimis gieskat. Ollugat liikojedje jovkui ja spiežžo gieđaideaset go joavku lei lávddi alde.

Blacksheeps Troanddimis
Foto: UKM Norge

Blacksheeps lei mielde Nuoraid kulturdeaivvadeami loahppadoaluin Troanddimis geassemánu čihččet gitta ovccát beaivái. Vuosttaš eahkeda sii lávlo lávlaga "Gold Lion" duhátguoktečuohte geahčči ovddas Olavshallenis Troanddimis. Vaikko jietna leige heittot, de orro guldaleaddjit ja geahččit duhtavaččat joavkkuin. Ollugat spiežžo gieđaideaset go joavku lei lávddi alde, čállá Unjárgga gieldda interneahttasiidu.

Rámiduvvo neahttasiidduin

Nuoraid kulturdeaivvadeami doaimmahus čállá dán neahttasiidduinis: "The Blacksheeps lea rockjoavku, mas leat mielde Victoria (14), Agnete (12), Emelie (14) ja Alexander (13). Sii ledje hirbmat čeahpit, vaikko leatge dušše 12-14 boarrás, de ledje hirpmástuhtti čeahpit".

Maŋit eahkeda čuojahii Blacksheeps olgokonsearttas Ilaparkenis. Doppe čuojahedje maid "Gold Lion" ja Wolfmother-lávlaga "Woman".

Besse vel ovtta konseartta doallat

Vuot rámidit lágideaddjit joavkku neahttasiidduineset: "Joavku mii duođai hirpmástuhtii min lei The Blacksheeps Finnmárkkus eret, nuorra lávlu jietna lei dego gullat rávisolbmo lávlumin ja dat lei hui fámolaš. Dát lei okta stuorámus vásáhusain dan guovtte diibmosaš konsearttas.

Blacksheeps lihkostuvai nu bures ahte válljejuvvui ovtta viđa joavkkus mii beasai čuojahit Studentersamfunnas seammá eahkeda. Doppege orro olbmot issorasat liikomin jovkui ja spiežžo gieđaideaset, čállá Unjárgga gieldda interneahttasiidu.

Geahča Blacksheeps filkkagilvvuin

Geahča Blacksheeps lávddi alde Troanddimis