Les på norsk:

Guovdageainnu girkolaš oktasašráđđi lea ohcan suohkanis badjel 500.000 ruvnno dárbbašlaš goluid máksimii.

Dan čállá Altaposten.

Ráđđi čállá ohcamušas Guovdageainnu suohkanii ahte sii leat identifiseren stuora dárbbuid, ja leat ohcan suohkanii oktiibuot 514.532 ruvnnu dárbbašlaš goluid gokčamii.

Oktasašráđi ohcan galgá meannuduvvot politihkalaččat lávdegottiin, ja loahpalaččat mearriduvvo gielddastivrras borgemánu loahpas.

- Dat doaibmabijut maid girkolaš oktasašráđđi čilge ohcamis, leat dehálaš doaibmabijut girku jođiheapmái, čállá gielddadirektevra iežas árvvoštallamis.

Muhto Guovdageainnu suohkanis eai leat ruđaid maid sáhttet juolludit oktasašráđđái.

- Gieldda 2024 - 2027 ekonomiijaplána geavahii olles juogadanfoandda vai šaddá dássedeattus. Dat mearkkaša ahte geassemánus dán jagi eai gávdno ruđat liigedoarjagiidda siskkáldasat gielddas eai ge olgguldas, čilge gielddadirektevra.

Dasto suohkan lea ROBEK-listtus ja ferte 2024 lohppii ráhkadit geatnegahtti plána gos galget geahpedit doaibmajagi goluid 40 miljovnna ruvnnuin.

Ná ohce sii ruđaid:

74.000 ruvnnu kantuvrabráhkkii
172.938 ruvnnu buollindieđihanvuogádahkii girkui
12.594 ruvnnu ođđa alárbmavuogádahkii
39.000 ruvnnu ođđa doaibmavistái
130.000 ruvnnu hávdesadjehálddašeami ášše- ja arkiivavuogádaga ođasmahttimii
30.000 ruvnnu mentorortnegii ja kursa ođđa girkoverddii
10.000 ruvnnu bargiid čálgodoaibmabijuide
46.000 ruvnnu searvegoddebláđiid prentemii