Mannan gaskavahkku rájes sotnabeaivái galledii Davvi-Hålogalándda bisma Olav Øygard Porsáŋggu gieldda. Dán mátkkis beasai son oaidnit ja gullat mo olbmot Porsáŋggus barget girkolaš eallimis. Øygard leamašan bisman guokte jagi bismagottis mii fátmmasta Tromssa, Finnmárkku ja Svalbárdda.
Áŋgiris olbmot divvo kapealla
Mátkkis Porsáŋggus gieskat galledii bisma Olav Øygard Skuvvanvári, Čuđegietti, Billávuona ja Leavnnja. Son lohká erenoamážit muitit olbmuid áŋgirvuođa Skuvvanváris gos gili olbmot eaktodáhtolaččat divvu kapealla mii lei mieskan. Skuvvanvári kapealla huksejuvvui 1963:s ja kapealla lea riikkaantikvára kulturmuitolisttus. 2013:s divvugohte gili olbmot dán kapealla mii juo lei dan mađe mieskkan ahte giddejuvvui 2012:s. Øygard deaivvadii soapmásiiguin geat eaktodáhtolaččat divvu kapealla ja sin bargguid bisma rámiida.
Golbma giela addá áddejumi eallimii
Porsáŋgu lea golmmagielat gielda gos dat gielalaš ja kultuvrralaš máŋgga bealátvuohta lea servvodahkii eambbo riggodahkan dan sadjáigo váttisvuohtan dahje hástalussan, lohká Øygard. Ipmilbálvalusain Porsáŋggus gullojit buot golbma giela, sámegiella, kvenagiella ja dárogiella. Olbmuide lea buorre gullat ipmilsániid iežaset eatnigillii. Dát váikkuha maid buoret áddejupmái eallimii ja erenoamážit kristtalaš oskui go beassá sártni gullat iešguđet gillii, oavvilda bisma.
Šattai geahpas vázzit
Juohke gávccát jagi galgá bisma galledit bismagotti searvegottiid ja dál leat gávcci jagi vássán dan rájes go bisma galledii Porsáŋggu. Okta sis gii vásihii golmmagielat ipmilbálvalusa Leavnnja girkus Porsáŋggus mannan sotnabeaivvi, gos Davvi Hålogalándda bisma Olav Øygard maid oassálasttii, lei kárášjohkalaš Margit Pedersen gii ássá Leavnnjas. Maŋŋá go son beasai oaidnit ja gullat bisma de šattai vel beanta geahpas vázzit, lohká son.
Dát gal su movttiidahttá
Sonja Magnhild Nyby beasai maid vásihit Davvi Hålogalándda bismma Leavnnja girkus ja son lohká ahte lei buorre beassat oaidnit ja gullat su danin go dákkár deaivvadeapmi maid movttiidahttá sin buoremus láhkai bargat girkoeallima ovddas Porsáŋggus. Sonja Magnhild lávlu maid Leavnnja girkokoaras.
Unnit gielat berrejit eanet gullot
Davvi Hålogalándda bismma ráđđeaddi lea ovddeš Kárášjoga báhppa Karl Yngve Bergkåsa. Son muitala Porsáŋgulaččaid bures vuostáváldán sin. Bergkåsa muitala sin fitnan Čuđegiettis, Billávuonas, Leavnnjas ja maid Skuvvanváris nugo bisma muitalii.
Olbmot leat muitalan bargguid birra maid sii eaktodáhtolaččat barget searvegotti ovddas ja dan birra leamašan somá gullat, lohká Karl Yngve Bergkåsa. Son sávvá maid sámegiela ja kvenagiela eanet almmolašvuođas gullot go dušše girkus ja dainna berre Porsáŋggu gielda duođalaččat bargat,lohká son.