"Biibbal juohke dállui máilmmis", dakkár áigumuš lea kristtalaččaid-gaskkasaš lihttus. Dát lihttu lea riikkaidgaskasaš ovttasbargu. "Ungdom i Oppdrag" jođiheaddji Andreas Nordli muitala iežaset álgit juohkit Biibaliid Norggas golggotmánu.
Juohkigohtet Biibaliid Finnmárkkus
Finnmárkolaččat leat dat vuosttažat Eurohpas geat ožžot Biibala juohke dállui. Muhto Finnmárkkus leat olu sápmelaččat, ja dáidda galggašii Biibbal sámegillii. Dađibahábut ii leat vuos ođđa Biibbal sámegiillii gárvvis, danne skeŋkejit sii Lukas evageliuma ja Sálmmaid girjji sidjiide geat hálidit sámegillii Biibbal-teavsttaid.
Son šalloša go sámiide ii leat olles Biibbal sámegillii, livččii gal Ođđa Teastameanta sámegillii, muhto dan lohká šaddat menddo divrrasin oasttit, ja sis ii leat gal ruhta dan oasttit.
Eai leat vikkaheamen olbmuid jorgalussii
Ii son mieđit bibbaljuohkima leat danne ahte dal áiggošedje jorgalusaid dagahit, ja oččodit olbmuid kristtalaš oskui.
Sin áigumuš lea baicce čájehit mo Norggas lea eallit, ja mo Biibbal lea leamaš geavahusas Norggas áiggiid čáđa. Dan lea sin organisašuvdnii "Ungdom i Oppdrag! hui dehálaš beassat muitalit.
Dat ahte sii skeŋkot Biibaliid, dat lea dušše oasáš das maid sii áigot čađahit, go sii maid lágidit deaivvademiid Finnmárkku gielddain.
Golggotmánus juohkigohtet Biibaliid Finnmárkkus
Golggotmánus sii juohkigohtet biibaliid Finnmárkkus, ja dalle johtet 200 nuora, eanaš studeanttat,dáluidmielde ja skeŋkejit biibaliid. Ja dasalassin leat sis 16 gielddas lávdegottit, mat maid barget veahkkin sidjiide
"Ungdom i oppdrag" lea organisašuvdna mii doaimmaha dán barggu, juhket Biibaliid ja lágidit deaivvademiid gos Biibbal ja kristtalašvuohta lea guovddážis.
Organisašuvnna jođiheaddji, Andreas Nordli, muitala iežaset gullat riikkaidgaskasaš kristtalaš organisašuvdnii mas oassálasttet girkuid-gaskasaš lihkadusat. Dáin lihkadusain leat eanaš nuorra olbmot miellahttun, ja dákkár lihkadusat leat 200 riikkas, maiddái Norggas.
