NRK Meny
Normal

Bihpporgáhkuin ávdnasat mat sáhttet vuolggahit borasdávdda

Norgga geavaheaddjiráđđi lea iskan 15 iešguđetlágan bihpporgáhkkošlájaid akrylamiida sisdoalu hárrái, ja celket ahte bihpporgáhkuid buvttadeaddjit eai oro berošteamen akrylamiida geahpideamis.

Pepperkaker

Muhtun bihpporgáhkošlájain lea mihttiduvvon akrylamiida lagabui bajimus dohkkehuvvon meari. Akrylamiida sáhttá dagahit borasdvádda.

Foto: Ole Andreas Bø / NRK

Geavaheaddjiráđi gulahallanráđđeaddi Maren Van Buren Struksnæs, čállá ahte dáid áiggiid leat gávppiin ollu ja iešguđetlágan industriijagoikaduvvon bihpporgáhkut vuovdimassii, ja main akrylamiida sisdoallu rievddada.

Borasdávdda

Akrylamiida lea dearvvašvuođa vahágahtti ávnnas mii vuođđuduvvo go karbohydráhtarikkis biebmogálvvuid vuoššá oljjus, báistis goikada dahje gáhkke ja láibu. Ávnnas sáhttá vahágahttit olbmos nearvavuogádaga, ja adnojuvvo ávnnasiin mii sáhttá dagahit ahte borasdávda ovdánahttojuvvo.

Lahka dohkkehuvvon meari

EO oaivvadeaddjis lea mearriduvvon ahte akrylamiida sisdoalu ii galgga leat badjel 1000 mikrográmma juohke gilo nammii. Iskojuvvon bihpporgáhkuin ii lean akrylamiidasisdoallu bajábealde dan rájá, muhto muhtun šlájain akrylamiidasisdoallu lei 810 mikrográmma mii lea eanet go maid eará šlájain leat mihtidan, cealká Geavaheaddjiráđđi.

Gáhkkejeddjiin ovddasvástádus unnidit akrylamiida

Iskkadeapmi čájeha ahte vuolimus akrylamiidasisdoallu rievddadii 38 mikrográmmas juohke gilo nammii gitta 810 mikrográmma rádjai, čájeha Geavaheaddjiráđi iskkadeapmi.

Gunstein Instefjord, Fagdirektør mat og handel

Geavaheaddjiráđi biebmu ja gávppašeami fágadirektevra, Gunstein Instefjord

Foto: Kjell Håkon K. Larsen

— Biebmogálvoindustriijas leat alddis ovddasvástádus unnidit akrylamiidasisdoalu iežaset biebmogálvvuin, mii mearkkaša ahte buohkat galget dan mii praktihkalaččat lea vejolaš akrylamiida sisdoalu geahpideames.

Geavaheaddjiráđi gávdnosat orrot čujuheamen dohko ahte eai buohkat daga doarvái akrylamidasisdoalu geahpideames, dadjá Geavaheaddjiráđi biebmu ja gávppašeami fágadirektevra, Gunstein Instefjord almmuhuvvon preassadieđáhusas.