Austrália KAGE dánsunsearvi lea bargamin dánsun- ja musihkkačájáhusain mas neavttárat Norggas ja Austrálias ovttasbarget. "Caught in the middle" čájáhusain sii geahčalit muitalit mo eiseválddiid koloniserenpolitihkka váikkuhii sápmelaččaide ja Austrália aborigiinnaide. Guokte vahkku sii leat dássážii hárjehallan "Dansarena nord" studios Hámmárfeasttas.
Čájáhus Heath birra
Kate Denborough, gii lea Melbourne gávpogis Austrálias eret, lea dán bihttá bagadalli ja dáiddalaš jođiheaddji. Son muitala oahpásmuvvan aborigiinnain, Heathain, gean vuođul prošeakta vuolggahuvvui. 1976:s adopterejuvvui son vilges Austrália bearrašii ja dán bearrašis leat fuolkkit Norggas.
Heath lea riegádan ja bajásšaddan Austrálias ja son lea váldán dáža Bergersen goarggu. Dánsumiin ja musihkain sii áigot muitalit dán historjjás. Okta sis gii ovdanbuktá musihka dán čájáhusas lea Sara Marielle Gaup Beaska.
Erenoamáš prošeakta
Elle Sofe Henriksen lea koreográfa ja filbmadáhkki muhto "Caught in the middle" dánsun- ja musihkkačájáhusas son dánsu. Leat ollu iešguđetlágán olbmot geat barget dainna prošeavttain ja dat lea hui somá, lohká Elle Sofe Henriksen.
Prošeavttas oassálastet olbmot geat gullet dáža-, sámi-, Austrália- ja aborigiinna kultuvrii. Lea maid hui erenoamáš ahte sii barget nu jođánit, lohká Elle Sofe. Movttiidahttima dihti leat sii maid fitnan geahččamin mo badjeolbmot gárddástallet, lohká son.
"Caught in the middle" prošeavtta bagadalli ja dáiddalaš jođiheaddji Kate Denborough háliida vel oažžut buohkaid geat barget dainna čájáhusain Austráliai boahtte jagi. Loahpas son lohká vel háliidit jođašit dainna čájáhusain Davvi-Norggas, Suomas ja Ruoŧas 2018:s, dasto maŋŋá go leat geargan prošeavttain.