NRK Meny
Normal

Besse viimmat ávvudit gudnebálkkašumi

Vaikko miessemánus nammaduvvui gielda «Dán jagáš rádjegieldan», de easkka mannan vahkkoloahpa besse ohcejohkalaččat ávvudit bálkkašumi.

Utsjok er "Årets grensekommune" for 2015 i Finland

BIDJE SKÁBI EATNAMII: Ávvudeami oktavuođas ceggejedje skábi olggobeale Ohcejoga gielddaviesu.

Foto: Sierge Rasmus / YLE Sápmi

– Gal dat lea gudni midjiide. Muhto lea gal dábálaš ovttasbargu leamašan Deanu ja Kárášjoga gielddaiguin guhkit áigge. Dien dáfus ii leat gal ođđa ášši.

Dán dadjá Ohcejoga gielddastivrra sátnejođiheaddji, Ilmari Tapiola.

Miessemánus nammadii Suoma Rádjeguovlosearvi Ohcejoga gieldda «Dán jagáš rádjegieldan». Muhto easkka dá gieskat besse ohcejohkalaččat dan ávvudit.

– Máŋggabealat ovttasbargu

– Dás leat earenoamážit háliduvvon buktit ovdan ovttasbarggu Norgga beale gielddaiguin sihke sosiála ja dearvvašvuođa bealde, skuvlema bealde ja nuoraiddoaimmain ja dieđusge ealáhusaid bealde.

– Dáppe lea máŋggabealat ovttasbargu juohke láhkai.

Nie rábmui Rádjeguovlosearvvi jođiheaddji, Matti Väistö, ávvudeami oktavuođas mannan vahkuloahpa, YLE Sámi dieđuid mielde (olgguldas čujuhus).

(Joatkke lohkat vuolábeale gova)

Utsjok kommune er Årets grensekommune 2015 i Finland

ERENOAMÁŠ ÁVVUDEAPMI: Dát skáhpi gohčoduvvo dál «rádjegieldamuorran». Rádjeguovlosearvvi jođiheaddji, Matti Väistö, olgešbealde.

Foto: Sierge Rasmus / YLE Sápmi

– Kievrras sámi gielda

– Ohcejoga iežas spesiála iešvuohkin lea háliduvvon muitit dan, ahte dát lea kievrras sápmelaš gielda ja mii leat ovdalge leamašan ovttasbarggus Rádjeguovlolihtuin dáppe Ohcejogas, dajai Rádjeguovlosearvvi jođiheaddji maiddái.

Gielddastivrra sátnejođiheaddji, Ilmari Tapiola, namuha earret eará ovttasbargguid mat gusket buollinčáskkadeapmái, gádjunbargui, ja Sirpmá ja Ohcejoga skuvllaid lonuhallanortnegii.

– Ovdamearkka dihtii leat mii beassan oastit dearvvašvuođabálvalusaid norggabeale kránnjágielddain, maid mii ieža eat sáhte fállat iežamet ássiide.