Beatnagat boldon ja báhččon

– Mun gal ledjen jo ráhkkanan ahte ii leat eallime, muhto in jáhkán ahte jur nie fasttit, ahte boaldán vel, dat gal lea hui váivi, lohká Kirsten Sara Gaup Turi.

Ovdalaš juovllaid jávkkai su beana Guvge ruovttus Ávžžis, unna gilážis miilla nuorttabeale Guovdageainnu čoahkkebáikki.

Lávvordaga oaččui dieđu ahte beana lei gávdnon muhtin bisánan sajis E45 geainnu guoras, máŋga miilla Ávžžis eret.

Beana gávdnui ovttas nuppiin eará beatnagiin mii maid lei jávkan Ávžžis seamma áigge go Turi beana.

• Loga maid: Presideanta ođđajagi sártnis:– Sámegiella vuoitá ođđa arenaid

iFinnmarken aviisa almmuhii ášši vuosttažin.

– Ilgat oaidnit

Lei dan nuppi beatnaga eaiggát gii gávnnai beatnagiid, go oaččui dieđu goddon beatnagiid birra.

Turi lea ieš maid fitnan geahččame beatnagiid, ja oinnii ahte dat nubbi lei su beana.

– Gal dat lei oalle ilgat ja váivi oaidnit, muhto mun oidnen goit ahte ii leat goit biidnahuvvame gostege go lea láhppon, dadjá Turi.

Son imašta manne beatnagiid leat stuoraluodda gurrii boaldán.

– Ii dat oro albma olbmo mehtelusat, gal diet orro ártet, go jo lea báhčán, manne de galgá vel boaldit dan ja dohko doalvut. Das ledje gunat vel birra, das dat dieđusge lea cahkkehan dan, lohká Turi.

iFinnmarken almmuhii ášši vuosttažin.

– Roavva rihkusášši

Son ii vel dieđe áigu go váidit ášši politiijaide.

– Lean veahá guoktálastán, ii hal das soaitte mihkkege ávkkiid, ballá Turi. Son áiggui odne fitnat leansmánnekantuvrras politiijaid ságain, muhto dat lei gitta.

Jus beanaeaiggádat eaba váidde ášši politiijaide, de áigu elliidsuodjalus organisašuvdna Dyrevernalliansen dan dahket.

– Daid dieđuid mielde maid dás oaččun, de lea dá roavva rihkusášši.

Nu dadjá Dyrevernalliansen jurista ja kommunikašuvdna jođiheaddji, Live Kleveland.

– Jus beatnagat ledje ain eallime go daid cahkkehii, de lea ášši vel duođalabbot. Dan sáhttá šibitdoavttir gávnnahit jus obdusere beatnagiid, dadjá Kleveland.

Jagi giddagas

Dyrevernalliansen:a Kleveland muitala ahte sii leat ovdal vásihan sullasaš ášši, mas muhtun dievdu dubmejuvvui jáhkkái giddagassii. 

Muhto go son dovddastii dagu, de ii dubmehallan go 90 beaivái.

– Dákkár vearredagus lea elliidsuodjaluslága mielde ráŋggáštus čohkkát jagi giddagasas, jus vearredahkki lea boaldán beatnagiid eallinaga, de lea lea ráŋggáštus gitta golbma jagi giddagas, dadjá son.

Politiijat eai leat dutkagoahtán ášši, ja beatnagat leat ain bisánanbáikkis.

• Loga maid: Elghunden Sako trolig drept av bjørn – kun tarmene og skinnet lå igjen