NRK Meny
Normal

Beaska Niillas: – Mii eat hálit ruvkkiid Sápmái

Deanuleagi ruvkevuostálastiid koališuvdna dáhttu Karelian Diamond Resources -fitnodaga geassádit buot ruvkedoaimmain Sámis. Ruvkevuostálasti Beaska Niillas doalvu reivve odne ruvkefitnodaga váldokontuvrii Dublinai.

Beaska Niillas

Beaska Niillas doalvu čielga dieđu ruvkefitnodaga váldokontuvrii: 'Mii eat hálit ruvkkiid Sápmái'.

Foto: Carl-Gøran Larsson / NRK

Nu čállá Yle Sápmi sin neahttasiidduin.

Ohcejoga diamántaruvkeáššiis lea leamaš jaskat geasi rájes. Ruvkevuostálastiid bargu lea goittotge jođus.

Ovttasbargojoavku Anti-Mining Coalition of Deatnu Valley lea mearridan geiget reivve Karelian Diamond Resources -fitnodahkii. Reivve doalvu fitnodaga váldokontuvrii Dublinai ruvkevuostálastiid koališuvnna lahttu Beaska Niillas.

Dáhttot ruvkefitnodaga geassádit Sámis

Ohcejoga ruvkevuostálastit leat juo geasi rájes čohkken oktii návccaideaset ja Deanuleagi ruvkevuostálastiid koališuvdnii gullet sihke searvvit ja ovttaskas olbmot. Sii leat čállán reivve Ohcejogas dollojuvvon álbmotčoahkkimiid vuođul.

Reivves lea čielga ávžžuhus, ahte Karelian Diamond Resources galgá geassádit Sámis ja ahte sin doaimmat leat lágaheamit Sámis.

– Mii ákkastallat dan riikkaidgaskasaš konvenšuvnnaiguin, muitala reivve sáhttoalmmái Beaska Niillas.

Ii bala makkár vuostáiváldin lea

Dálá dilis lea vel eahpesihkkar, boahtágo Ohcejohkii makkárge ruvki. Ruvkevuostálastit hálidit goittotge doalvut dieđu iežaset oaivilis. Beaska Niillas ii bala mo su váldet Dublinas ruvkefitnodaga váldokontuvrras vuostá.

– Jus mu eai váldde vuostá, de mun vaikko spihkkárasttán dan reivve seaidnái, árvala Beaska Niillas, guhte mátkkošta mánnodaga Dublinai.