– Lean hui čeavlái go juo mus sihke eadnán ja áddján geat guktot leaba beroštan ollu politihkas. Etniinan gal sáhtán ain hállat politihka. Son han lea oahpahan munnje hui olu, dadjá Aili Guttorm.
Moss-ássi hállá iežas eadni birra, Anita Persdatter Ravna, gii maŋimuš áigodagas leamaš Lulli-Norgga válgabiire NSR-áirras Sámedikkis.
Muhto go eadnis ii šat joatkke evttohassan, de «addá sáttasoappi» viidásabbot nieidasis.
Ii dovdu noađđin
Aili Guttorma áddjá ii dadjo leat vaikko gii.
Hans Guttorm-rohkki, gii jámii 2013, lei earret eará mielde nannet ja stuoridit Norgga Sámiid Riikkasearvvi, ja son lea Kárášjoga sátnejođiheaddji leamašan.
Vaikko bearašárbevierrun lea šaddan Sámediggái válljejuvvot, de ii dovdu gal noađđin Aili Guttormii.
– Ii bággu gal leamaš. Munnje gal álo leamaš miellagiddevaš čuovvut mielde sámepolitihkas, erenoamážit go dáppe máddin orun.
Nuorat ja giella
Aili Guttorm lea gal moddii juo searvan Sámedikki dievasčoahkkimiidda várrelahttun, earret eará go eatnistis ii leat vejolašvuohta leamaš searvat.
– Mii du váibmoášši šaddá sámediggeáirrasin?
– Sámegieloahppu. Dáppe máddin ii leat nu álki sámegieloahpu oažžut, ovdamearkka dihtii dáppe Mossas gos mun orun. Buohkain galggašii leat sámegieloahppofálaldat beroškeahttá gos ásset, fástida Guttorm, ja lasiha:
– Ja sámi gávpotnuoraid deaivvadanbáikkit – ahte sámenuorain leat arenat gos sáhttet ovdamearkka dihtii sámegiela hállat ja deaivvadit.
Ii duostta vel ávvudit
Aili Guttorm bellodat- ja válgabiireskihpár, Piera Heaika Muotka, beassá maid jáhkkimis sámediggeáirrasin, goalmmátsaji evttohassan.
– In mun dal duostta vel ávvudišgoahtit. Gal dat leat ain jienat maid fertejit lohkat, muhto orruleamen bures mannamin, dadjá Muotka.
– Muhto doaivumis válljejuvvon, ja dalle šaddá ollu bargu masa illudan, lasihastá.
Sámenuoraid iešdovdu
Maiddái Muotka váibmoáššit leat sámenuoraid deaivvadanbáikkit, ja čujuha erenoamážit sámi festiválaide ja nuoraidservviide.
– Nugo Noereh-searvi, ja Márkomeannu-festivála mas ieš lean máŋgii eaktodáhtolažžan bargan.
– Lean ieš vásihan man hirbmasit dat nannejit sámegielaid ja sámenuoraid iešdovddu. Diekkár lágidemiid ja servviid bokte easka fuobmá ahte olmmoš ii leat okto rahčamin sámi iešdovddu ovddas, dadjá Muotka.
Doalaha sámediggesaji
Lulli-Norgga válgabires válljejuvvoba maiddái NSR vuosttaševttohas Tor Gunnar Nystad ja hui jáhkkimis Bargiidbellodaga Jørn Are Gaski, geat dasto guktot joatkkiba sámediggeáirrasin.
Dasa lassin lea Davvikalohttaálbmogis buorit vejolašvuođat válljejuvvot Sámediggái ovttain áirasiin, ja nu maiddái Sámeálbmoga bellodagas.
Válgabires leat oktiibuot guhtta áirasa.