Beatnagii njoamui skábba: - Ii goassige leamaš ná vearrái

Skábmamánu 12. beaivve beasai ealgabeana Suki báttis ruovttus, Unjárgga gielddas.

Beana ruohtastii riebana maŋŋái. Ja go lei gollan muhtun áigi, de Sukis álge saŋážat, dat ruohkadišgođii.

– Mus leat leamaš beatnagat maiguin leamaš skábba, muhto ii goassige leamaš ná vearrái, lohká Henriksen.

Beanaeaiggát Tor Gunnar Henriksen lea sihke ealga- ja riebanbivdi, ja lea maiddái fuođđolávdegotti lahttu.

Dálkkodeamit leat máksán lagabui 5000 ruvnnu, ja dál lea Suki viimmat dearvvasmuvvamin.

Dál lea Henriksenis čielga ávžžuhus olbmuide geat oidnet skábbariebaniid.

– Dieđit fuođđolávdegoddái vajot go oainnát skábbariebana, ja jus dus alddát lea vuoigatvuohta báhčit, de daga dan ja dieđit fuođđolávdegoddái, bivdá Henriksen.

Njoammunvárra

Agria ealliiddáhkádusa hálddahusdirektevra Marianne Broholm Einarsen muitala ahte beatnateaiggádat berrejit leat hui várrogasat jus skábbarieban lea guovllus.

– Jus oainnat skábbariebana guovllus gos orut, de it berre beatnagiin vázzit dain guovlluin, vai eastadivččet skáppa njoammumis beatnagii, dadjá Einarsen.

– Mo njoammuda skábbarieban dávdda beatnagii?

– Skábbaealli sáhttá njoammudit go guoská beatnagii, ja maiddái dalle jos beana jorrá seamma sajis gos skábbaealli lea leamaš, muitala Einarsen.

Álki divššodit

Norgga ealliidsuodjalusa beaivválaš jođiheaddji ja šibitdoavttir Åshild Roaldset muitala ahte skábba lea saŋášdávda man lihkus lea álki dikšut.

– Skábba givssida go dat nu sakka sakŋidahttá. Eai dárbbaš olu skábbamiddat ovdalgo garra dávdamearkkat ihtet, muitala šibitdoavttir.

Roaldset muitala ahte eanaš beatnagat dearvvasnuvvagohtet jođánit go ožžot divššu.

Norgga ealliidsuodjalus sávašii maiddái ahte riebanat ožžot divššu skáppa vuostá.

– Mii sávašeimmet ahte šattašii buoret vuogádat mo sáhtašeimmet dikšut skábbariebaniid. Skábbarieban ii dárbbaš bahččot go skáppa lea hui álki dikšut, loahpaha Roaldset.

Eanet ságat NRK Sámi neahttasiiddus

Les flere samiske nyheter her