NRK Meny
Normal

Jan Garbarek Varangerfestiválii

Varangerfestivála ávvuda dán jagi 25 jagi. Dovddus Jan Garbarek, min iežamet Mari Boine, Nils Petter Molvær ja Sivert Høyem leat stuorámus namat čakčageasi doaluin.

Jan Garbarek
Foto: Preassagovva, Guri Dahl

 Varangerfestivála lágiduvvo Čáhcesullos borgemánu gávccádis gitta guoktenuppelogát beaivái. Dán jagi doalut leat albma ávvodoalut ja lágideaddjit leatge lihkostuvvan fitnet duođaid stuorra násttiid iežaset konseartalávddiide.

Máilmmesenšašuvdna Čáhcesullos

Norgga stuorámus riikkaidgaskasaaš jazzanásti boahtá viimmat Varangerfestiválii. Lágideaddjit čállet preassaideđáhusasteaset, ahte go riemut dál ávvodit 25 jagi, de sii čevlliin bovdejit eallima stuorámus konseartavásáhussii. Joavkkus leat Jan Garbarek (saksofona), Trilok Gurtu (rumbbut ja rekuššuvdna), Eberhardt Weber (bássa) ja Rainer Brüninghaus (flygel).

Mari Boine 

Mari Boine
Foto: Liv Inger Somby / NRK

Jagis 2003 galledii Mari Boine maŋimusat Varangerfestivála. Das rájes lea sus boahtán ođđa CD-skearru, "Idjagieđas", mii lei evttohuvvon Spellemann-bálkkašupmái. Mari lea okta Norgga dovddumus ártisttain musihkkašlájas beroškeahttá. Ja su namma lea maid dovddus máŋgga sajis olgoriikkain. Son lea moanaid heave čuojahan Varangerfestiválas ja festivála lágideaddjiid mielde leat geahččait ja guldaleaddjit liikon dasa. Mari Boine lea eahpitkeahttá stuorámus riikkaidgaskasaš ártista mii lea riegádan Finnmárkkus, čállet lágideaddjit preassadieđáhusasteaset.

Nils Petter Molvær 

Nils Petter Molvær
Foto: Preassagovva, Bjørn-Eivind Årtun

Nils Petter Molvær čuojahii Varangerfestiválas jagis 1998. Lágideaddjiid dieđuid mielde lea dakkár konsearta man olbmot ain mielas muittašit. Molvær leage dovddus ártista riikkagaskasaš musihkkalávddiin. Su musihkka lea seaguhus jazz, house ja electronica musihkas, mas leat oasit hiphopas, rockas ja popmusihkas. Su maŋimuš skearru "ER" oaččui buori árvosániid musihkkabláđiin birra máilmmi.

Sivert Høym & The Volunteers

Sivert Høyem
Foto: Paal Audestad

Sivert Høyem lea šaddan dovddusin Norgga rockmusihka leavgaskiippain Madrugada, gos son lea lávlun. Joavku lea dovddus sihke Norggas ja máŋgga sajiin olgoriikkas. Vuosttaš oktonasskearruin "Ladies and gentlemen of the opposition", mii almmuhuvvui jagis 2004, son čájehii ahte birge bures soloártistan maid. Sivert Høyem nubbi oktonasskearru "Exiles" lea johtán dego vuodjagáhku. Dál leat jo eambbogo 100.000 gáhppálaga vuvdon dán skearrus.

  GULA RUNAR GREEN JEARAHALLAMA