Máŋga teáhterberošteaddji Kárášjogas hirpmástuvve go sámi našonálateáhter Beaivváš mannan mánus almmuhii, ahte sii eai áiggo čájehit Laila Stiena bihtá "Vekselsang - Gođus" Kárášjogas.
Beaivváš válljii hilgut Kárášjoga dán vuoro dannego báikkis lea muhtin čájálmasaide boahtán hui unnán olbmot.
Gudnejahttá digaštallama
Beaivváš Sámi Teáhtera teáhterhoavda Haukur J. Gunnarsson lohká, ahte sii teáhtera beales leat hirbmat giitevaččat go Kárášjogas bohte nu olu cuiggodeamit dán oktavuođas.
- Kárášjogas bohte garra reakšuvnnat min mearrádussii hilgut báikki dán vuoro. Dat lea mu mielas hirbmat buorre. Vearrámus mii livččii sáhttán dáhpáhuvvat lea, ahte jus ii giige livčče fuobmánge ahte mii eat dohko boađe. Dalle gal livččen duođaid heađástuvvan, čilge Gunnarsson.
Nuppástuhtte mearrádusa
- Dáshan šattai digaštallan. Ja digaštallan lea dehálaš ja dat lea maid dearvvaslaš teáhterii. Danne leat mii mearridan, ahte čájáhusmátki loahpas galledat liikká Kárášjoga, almmuha teáhterhoavda Haukur J. Gunnarsson movttegit.
Beaivváža čállingottis muitalit dál, ahte "Vekselsang - Gođus" čájehuvvo Kárášjoga kulturviesus lávvardaga juovlamánu vuosttaš beaivve diibmu 19.00.