NRK Meny
Normal

Beaivváža 30 jagi ávvudeapme

Beaivváš sámi nášunalateahter ávvuda dán jagi 30 jagi. Dán oktavuođas ráhkadit dán rádjai divraseammos buktaga, go ođđa hámis čájehit Beaivváža vuosttaš čájálmasa "Min Duoddarat".

Fra Beaivváš-stykket "Å dele en bølge"
Foto: Ingun A. Mæhlum. Báru juogadeapmi, Beaivváš Sámi Našunálateáhter.

Beaivváš sámi nášunalateahter lea dál ráhkadan ođđa čájálmasa, beakkán sámi teahter klassihkáris " Min Duoddarat".

Dát rockeopera dahje musikála, lei álgu dasa mii otne lea Beaivváš Sámi Našunálateahter.

Beaivváža stuorámus ja divraseammos buvta

6 millijuvnna kruvnna máksá ráhkadit dán bihttá. Ja leage stuorámus čajalmas maid Beaivváš goassige lea ráhkadan, muitala Beaivváža diehtojuohki Mikal Mienna.

Jahkásaččat leat Beaivvážis guokte stuorra čajalmasa, muhto dán jagi ii šáttago dát okta stuorra ávvubihttá, go dát gáibida olles bušeahtta.

Lávddi alde leat 7 neavttára, 2 dánsejeaddji ja 5 musihkára. "Min Duoddarat" heive bures ávvubihttán dannego das leat visot oasit mat galget leat teahterčájálmasas, nugo; konflikta, leaktu, suohtasat, duođalaš áššit, musihkka ja maiddái ráhkesvuohta, muitala Mienna.

Beakkán filbmadahki bagadallin

Beakkánis filbmadahki Nils Gaup lea bagadallin čajálmasas, ja son lei maid guovddážis dalle go Beaivvaš ráhkadii "Min Duoddarat" čájalmasa vuosttaš geardde. Gaup dadjá iežaset ferten ođasmahttit bihttá áiggi mielde, muhto vuođđokonflikta lea ain dat seamma.

Nicko Buljo gii maid lei mielde álgo álggus, lea dál neavttárin bihttás ja dadjá stuorra gutnin beassat neaktit beaivváža teahter klasihkáris.