ON álgoálbmotáššiid erenoamáš dieđiheaddji James Anaya lea dál fitname Roavvenjárggas čoaggime dieđuid raportii sápmelaččaid dili birra.
Muhto ruoššabeal sámit eai fátmmastuvvo dan raporttas. Nina Afanasjeva Guoládaga sámi searvi lea beahtahallan.
- GULDAL:
Afanasjeva lohká son lea váivašuvvan go ii beasa ovdanbuktit oainnuid erenoamáš dieđiheaddjái fárrolaga sámedikkiiguin.
Heajut dilli Ruošša bealde
Son ferte vuordit sáhkavuoru otnážii ja son áigu deattuhit ahte sámiin Guoládagas ii leat iežaset Sámediggi ja ahte lea hui váttis gulahallat eiseváldiiguin.
Birrasii 2000 sámit ellet Guoládagas ja sii leat guhkkin eret olahan seamma muddui go eará sámit. Sis ii leat iežaset parlameanta, giella lea garrasit uhkiduvvon ja eananrievttit leat geahnohuvvan.
Nina Afanasjeva gal beassá muitalit dan otná čoahkkimis, muhto erenoamáš dieđiheaddjis ii leat geatnegasvuohta váldit dan mielde su raportii go Ruošša eiseválddit eai leat seahkánan dan prosessii.
Erenoamáš dieđiheaddji James Anaya lohká goit ahte son lea mannan Ruoššas ja deaivvadan álgoálbmotovddasteaddjiiguin - muhto son ii áiggo kommenteret maid lea gávnnahan doppe ovdal go sus lea válmmas rapporta dan mátkkis.