Bargovejolašvuođat buorránit

Finnmárkkus lea dál buorre vejolašvuohta oažžut barggu go bargguhisvuohta unnu.

Nav og penger
Foto: Colourbox.no/Frode Wiik, NRK

Finnmárkku NAV-ossodaga jođiheaddji, Eva Lill Johansen Margit, muitala ahte das lea stuorra mearkkašupmi Finnmárkui.

– Dat addá buoret vejolašvuođaid olbmuide gávdnat sihke barggu ja bargofámu, Johansen Margit muitala.

GULDAL: Bargguhisvuohta unnu

Finnmárkkus lei ođđajagimánus 4,3 proseantta bargoveagas almmá barggu haga. Bargguhisvuohta lea goitge unnon jahkebealis 3,4 prosentii. Dát lea measta proseantta uhnit go álgojagis. Finnmárkkus leat dál oktiibuot 1.466 olbmo almmá barggu haga. Dát boahtá ovdan NAV varas bargguhisvuođaloguin.

Eva Lill Johansen Margit muitala ahte lea somá go bargomárkanat leat buorránan earenoamážit árbevirolaš ealáhusain, dego Finnmárkkus. Dáid ealáhusaiguin son oaivvilda guolleealáhusa ja minerálaroggama Máttá-Várjjagis.

– Finnmárkkus lea dárbu bargiide, ja jus olbmot háliidit bargguid, de lea sis dál buorre vejolašvuohta oažžut barggu, Eva Lill Johansen Margit lohká.