NRK Meny
Normal

Bargit eai ožžon bálkká rivttes áigái

Kárášjoga gieldda bargit eai ožžon bálkká mannan bearjadaga, eai ge ožžon dieđu ge dán birra, dadjá oahpaheaddji. Gieldda ráđđeolmmái dadjá dihtorváttisvuođaid sivvan ja son lei dáhtton hoavddaid dieđihit bargiide ahte bálká ii boađe.

Penger og sedler

Kárášjoga gieldda bargit eai oččon bálkká nugo dábálaččat - dihtorváttisvuođat sivvan dása, dadjá ráđđeolmmái.

Foto: Poppe, Cornelius / SCANPIX

Odne livččii dábálaččat bálkábeaivi Kárášjoga gielddas, muhto go lea vahkkoloahpa beaivi, de galgá bálká máksot ovddemus árgabeaivvi mii lei mannan bearjadat.

Lei heahpat go su kontos ii lean ruhta

Ravdna Anti

-Son duođái heahpanii go sus ii lean ruhta kontos go galggái máksit gálvvu gávppis, dadjá Rávdna Anti.

Foto: Marit Sofie Holmestrand / NRK

Kárášjoga mánáidskuvlla oahpaheaddji, Rávdna Anti muitala ahte lei heahpat ikte čuožžut gávppis go galggái máksit gálvvu koarttain ja go ii lean kontoi boahtán ruhta. Anti mielas lei erenoamaš unohas dáhpáhus. Su mielas lea ártet go bargit eai leat ožžon dieđu manne sii eai oaččo bálkká. Seamma leat eará gieldda bargit maid vásihan, dadjá Anti.

Dihtorváttisvuođat sivvan

Elfrid Boine

Dihtorváttisvuođat dagaheadje ahte bargit eai oččon bálkká, ja son dáhtui hoavddaid addit dieđu bargiide ahte bálká maŋŋona, dadjá ráđđeolmmái Elfrid Boine.

Foto: Ewa-Mari Hedman / NRK

Kárášjoga ráđđeolmmái, Elfrid Boine čilge ahte dihtorváttisvuođat dat leat sivvan manne ná geavai mannan bearjadaga. Boine dadjá ahte attii dieđu hoavddaide ahte galge dieđihit iežaset bargiide ahte bálká ii boađe bearjadaga.

Ii leat goassege ovdal dáhpahuvvan ahte bargit eai leat ožžon bálkká rivttes áigái. Ráđđeolmmái Elfrid Boine šálloša go ná geavái. Vuiosárgga áigu Boine iskat mii manai boastut go bargit eai ožžon dieđu, ja sávvá ahte bargit ožžot bálkká juo vuosárgga ovdalgaskabeaivvi.