NRK Meny
Normal

Bargit eai liiko go áigot rievdadit bargobiraslága - bissehit barggu guovtti diibmui

Odne diibmu 14 ja 16 gaskkas heitet bargit Unio, YS ja LO fágaservviin bargamis čájehandihte ahte sii leat duhtameahttumat ráđđehusa bargobiraslága rievdadanárvalusain.

Flyveblad for politisk streik
Foto: Sigrid Havig Berge / NRK

Bargoheaitta lea politihkalaš čalmmustahttin ja lea eaktodáhtolaš LO, YS ja Unio fágaservviid miellahtuide searvat. Fágasearvvit lohket ahte lea hui stuora beroštupmi searvat bargoheaitagii. Leat dieđihuvvon eanet go 120 báikkálaš akšuvnna Norggas.

Bargoheaitta čuohcá mánáidgárddiide, skuvllaide ja astoáiggeortnegiidda olles Norggas. Maiddái kollektiivajohtolahkii čuohcá bargoheaitta.

– Fallehit bargiid vuoigatvuođaid

Unio, YS ja LO fágasearvvit oaivvildit ahte árvaluvvon rievdadusat bargobiraslágas mielddisbuktet ahte bargosajit barggahit eanet gaskaboddosaš bargiid, ahte šaddet guhkibut bargovuorut, eanet geatnegahtton badjeláiggebargu ja dávjjibut bargu sotnabeivviid.

Bargoaddiorganisašuvdna NHO oaivvilda ahte rievdadusat leat smávvát ja hui dárbbašlaččat addit bargoaddiide vejolašvuođa ásahit eanet fásta bargosajiid.

Utdanningsforbundet jođiheaddji Raghild Lied oaivvilda ráđđehus iežas láhkarievdadanárvalusain falleha duođalaččat bargiid vuoigatvuođaid.

– Rievdademiiguin sáhttet šaddat eanet gaskaboddosaš bargit, eanet geatnegahtton badjeláigi badjeláiggemávssu haga ja eanebut geat šaddet bargat sotnabeivviid. Dát rievdada olbmuid eallinvuogi ja čuohcá olles bargoeallimii, lohká Lied.

Kárášjogas maid servet

Maiddái Kárášjogas lea bargoheaitta. Kárášjoga Utdanningsforbundet lea iežas miellahtuid ávžžuhan searvat bargoheaitagii, ja doppe galget sin miellahtut fárrolaga vázzit ráđđevissui diibmu 14, gos deivet miellahtuid dain eará organisašuvnnain.

Sin oahpaheaddjit áigot ráhkadit parolaid ja sii áigot doallat apeallaid.