NRK Meny
Normal

Barggosaje vuonan gájoduvvi

Nordlánda fylkasuohkan galgaj barggosajijt Svierigij jåhtet 5.000 kråvnåj diehti. Valla dálla la fylkasuohkanin ietjá árvvalus.

Otto Einar Johansen og Tove Mette Bjørkmo signerer kontrakten

HT Safe ASa jådediddje, Otto Einar Johansen ja jåhtulagá fylkarádevadde, Tove Mette Bjørkmo vásse vahko kontráktaj vuolláj tjállin.

Biehtsemánon Nordlánda fylkasuohkan diededij nágin gallegasj tuvsán kråvnåj diehti fylkasuohkan barggosajijt Svierigij galgaj jåhtet.

Sivva dási lij gå fylkasuohkan åtsåj viddnudagáv gut máhttá Nordlánda ruktodiededimev jådedit, ja Samres AB Svierigin gájbbedin 5.000 kråvnå binnep gå Hábmera viddnudak HT Safe AS.

Valla fylkkasuohkanin la dálla ietjá árvvalus.

Máhtudahka

Nordlánda fylkasuohkan næhttabiele baktu diedet sij vásse vahko bargov HT Safe ASaj juollodin ja kontráktaj vuolláj tjállin.

– HT Safe AS viddnudagán la ållo máhtudahka ja la riek tjiehpe ruvtojt diededit. Ávvudallap dájna buorre aktijvuodajn joarkket, javllá Nordlánda fylkasuohkana jåhtulagá fylkarádevadde, Tove Mette Bjørkmo.

Kontrákta gålmmå jage vihpá ja duodden máhtti dáv guokta jagij guhkedit. Juohkka jage HT Safe AS 2,4 millijåvnå kråvnå dán bargguj oadtju.

– Huj vuorbálasj

HT Safe ASa jådediddje la huj ávon.

– Dálla lav huj vuorbálasj. Buorre la gå bargge juorrulimes bessi. Dát barggo la midjij huj ájnas, javllá Otto Einar Johansen.