NRK Meny
Normal

Barggosaje soajttá gájoduvvi

Nordlánda fylkasuohkan galgaj barggosajijt Svierigij jåhtet 5.000 kråvnåj diehti. Ássje ij la ájn mierreduvvam, valla fylkasuohkanin la dálla ietjá árvvalus.

177 Nordland

HT Safe AS uddni dáv dievnastusáv jådet.

Foto: Simon Piera Paulsen / NRK

Bjørnar Klausen

Rádevadde Nordlánda fylkasuohkanin, Bjørnar Klausen.

Foto: Privat

Biehtsemánon Nordlánda fylkasuohkan diededij nágin gallegasj tuvsán kråvnåj diehti fylkasuohkan barggosajijt Svierigij jåhti.

Sivva dási la fylkasuohkan åhtså viddnudagáv gut máhttá Nordlánda ruktodiededimev jådedit, ja Samres AB Svierigin gájbbedin 5.000 kråvnå binnep gå Hábmera viddnudak HT Safe AS.

Valla fylkasuokanin la dálla ietjá árvvalus.

– HT Safe AS luodjun ja dan diehti lip ådåsis árvustallam. Guokta vahko dás åvddåla mierredijma HT Safe AS galggá dáv bargov oadtjot, diedet rádevadde Nordlánda fylkasuohkanin, Bjørnar Klausen.

Ådåsis luodjum

Nina Sandlund, Samres

Samres ABa doajmmajådediddje, Nina Sandlund.

Foto: Samres AB

Valla ássje ij la ájn mierreduvvam.

– Samres AS la aj luodjum, ja dálla hæhttup vas ådåsis árvustallat gåktu dahkat. Iv ájn máhte javllat gut dáv bargov oadtju, javllá Klausen.

Nordlánda fylkasuohkan diedet sávadahtte boahtte vahko mierreduvvá gut dáv bargov oadtju.

– Gájbbádusájt ållidip

Samres AB tjuottjot sij divna gájbbádusájt ållidi.

– Nordlánda fylkasuohkanin javlli mij ep la duodastahttám jus dákkir bargoj nahkap barggat. Fálaldagán ittjij tjuottjo sij dárbahin dákkir duodastusáv, javllá doajmmajådediddje Nina Sandlund.

Otto Einar Johansen

HT Safe AS jådediddje, Otto Einar Johansen.

Foto: Privat

Sån tjuottjot viddnudagán la máhtukvuohta.

– Miján le juo uddni ruktodiededibme Svierigin ja Oslo suohkana åvdås hiebadahtedum doalvov jådedip.

Sandlunda mielas bierri Samres AB dáv fálaldagáv dåjmadit.

– Álgon lij nav dat viddnudak gut binnemusát rávkaj bargov galgaj oadtjot. Dan diehti mij galgajma dáv bargov oadtjot.

– Máhtudahka bierri dættoduvvat

HT Safe AS jådediddje jáhkká ja sávvá HT Safe AS dáv bargov oadtju, dan diehti gå guokta advokáhta juo dáv ássjev li árvustallam.

– Dát la mijá viddnudagán ájnas barggo ja muv mielas ij la Nordlánda fylkasuohkan buorre bargov dahkam gå tjállin gåktu sihtin barggo galggá tjadáduvvat. Mij lip dájna dievnastusájn 30 jage barggam, ja muv mielas dát bierri ienebuv dættoduvvat gå 5.000 kråvnå, javllá Otto Einar Johansen.

Hábmera suohkanin barggosajijs binnu jus barggosaje Svierigij sirdeduvvi.

– La álgge riekknit mij dahpaduvvá jus 2,4 millijåvnå ruhtajådedimes massep. Værámusát vihtta barggosaje Hábmeris gáhtu, javllá Johansen.