- Mun mielas áiggun Anne Toriliin ovttasbargat, ja lean vissis dasa ahte son buktá dehalaš beliid Sámediggeráđi bargui dán áigodagas, dieđiha sámediggepresideanta Aili Keskitalo preassadieđahusas.
Balto šattai dán jagi sámediggeválggain Guovddášbellodaga 1. várrelahttun Ávjovári válgabiirres, ja galgá leat Guovddášbellodaga jietna ođđa ráđis.
LOGA EANET
Kárášjoga vuosttaš nisson sátnejođiheaddji
Anne Toril Eriksen Baltos lea guhkes ja govda politihkalaš hárjáneapmi Guovddášbellodagas, ja 34-jahkásažžan šattai son Kárášjoga gieldda vuosttaš nisson sátnejođiheaddji. Son lea dál válljejuvvon maiddái Finnmárkku fylkkadiggái.
Balto lea revisoran oahppan ja sus lea lassioahppu ekonomiijastivremis ja organisašuvnnas ja jođiheamis. Dál son bargá finánsa ráđđeaddin Seastinbáŋkkus 1 Davvi-Norga, seammás go lea gárvvisteamen loahpa ekonomiija ja strategalaš jođiheami masterbarggu Norgga árktalaš universitehtas Romssas.
loga eanet geat galget ovddastit du Sámedikkis boahtte njeallje jagi.