Johanas Nystad vásihii ahte heasta iežas skáidnii go ruohtastii áiddi čađa.
– Heasta dojii juolggi go lei nu suorganan, muitala Nystad.
Son muitala heasttaid ruohttagoahtit go bážanat gullojit. Danne bidjá heasttaid stálljii maŋŋelgaskabeaivve juo.
Oktasaš rakeahtat leat buorebut
Muhtin suohkaniin Norggas lágiduvvojit oktasaš rakeahttabáhčimat. Dat lea Nystad mielas buorre ortnet.
– Ovdal láveje dás báhčit jur stállja bajil. Dalle gal lávejin šaddat stálljii bidjat musihka rigeret, muitala heastaeaiggát.
Ráhkkaneapmi lea dehálaš
Šibitdoavttir Anveig Merete Nordsletta oaivvilda leat dehálažžan ráhkkanit bures ođđajagi ávvudeapmái.
– Muhtin eallit leat hui árggit, ja earát eai nu hirbmosit beroš dain rakeahtain, dadjá Nordsletta.
Šibitdoaktára rávvagat:
- Ále váldde ealli olggos go rakeahtaid bážát.
- Leage ealli luhtte jus lea balus.
- Bija áinnas musihka čuodjat.
Nordsletta muitala iežas oaidnán ealggaid go ruohtastedje iešguđet guvlui go márkanis báhčigohte rakeahtaid.
– Ealggat maid dieđusge suorganit go fáhkka bávkigoahtá, dadjá Nordsletta. Son dattetge ii jáhke bohccuide čuohcat go rakeahtaid báhčigohtet, jus eai leat jur márkan siste.
Gávdno dálkkas
Oallut eallit dovdet nu garra balu ahte doarggistišgohtet, eaige gávnna dorvvu gostege. De soaitá buorre geahččalit dálkasa addit daidda, oaivvilda šibitdoavttir Tina Hætta.
– Gávdnojit máŋggalágan dálkasat mat váldet balu eret. Muhtin dálkasiid ferte guhkit áiggi atnit, eará dálkasat ges leat dan fáhkka balu vuosttá, čilge Hætta.
Hætta maid dáguha ahte leat ollu dilálašvuođat mat sáhttet vearáskahttet elliid balu.
Son ávžžuha olbmuid jurdilit ovdal ovdamearkka dihte juhket alkohola.
– Ealli dovdá ahte eaiggát rievdá go juhká alkohola. Dat sáhttá vearáskahttet sin balu, čilge Hætta.