– Fylkkaid ja suohkaniid ovttastahttin Davvi-Norggas dagaha váttisin čoavdit daid hástalusaid mat čuožžilit dákkár viiddis geográfalaš guovllus, dan dihte go ovttastahttin dagaha guhkes gaskkaid, bieđgguid ássama, ja lea vuollegis olmmošlohku go maid stuorit čoahkkebáikkiin leat, dadjá Finnmárkku fylkkasátnejođiheaddji, Runar Sjåstad.
Ballá sámegiela ja kvenagielaid jávkat
Finnmárkku fylkkasátnejođiheaddji, Runar Sjåstad, lohka alddis dakkár balu ahte sámi giella ja kultuvra geahnohuvvá stuora regiovnnas. Son geassá ovdan Guovdageainnu, ja dadjá ahte jus mat Guovdageainnu ja Álttá suohkaniid galggašii ovttastahttit, de fertešii leat plána movt seailluhit sámi giela ja kultuvrra.
Sjåstad maiddái fuomášuhttá Porsáŋggu gieldda mii lea áidna gielda Norggas mii lea julggaštan iežas golmmagielat gielddan. Porsáŋggus lea dárogiella, kvenagiella ja sámegiella beaivválaš anus. Sjåstad dadjá Porsáŋgu gieldda odne juo rahčat dálá regiovnnas, vaikko buot golbma giela leat beaivválaš anus Porsáŋggus. Daid gielaid seailluhan- ja ovddidanbargu sáhttá jávkat stuorra suohkanis dahje regiovnnas, ballá son.
– Ferte eaktodáhtolaš ovttastahttin
Finnmárkku fylkkasátnejođiheaddji lohká ovttastahttima hárrái, ahte Finnmárkkus leat dál juo gielddat mat hupmet sihke ovttasbargama ja ovttastahttima birra eará gielddaiguin.
– Lea buorre go suohkanat árvvoštallet viiddis ovttasbarggu ja eaktodáhtolaš ovttastahttima eará gielddaiguin, dadjá Sjåstad. Son maiddái čujuha Finnmárkku fylkkadikki mearrádussii mas daddjo ahte Finnmárku galgá bissun sierra fylkan nu movt dál
– Jus galggaš čađahit ovttastahttima, de lea dehálaš ahte lea čađahuvvo buorre ovdabargu, ahte ovttastahttin čađahuvvo eaktodáhtolašvuođa vuođul iige bákkolašvuođain álbmoga dáhtu vuostá, ja maiddái ahte álbmot beassá oaiviliiddis ovddidit sierra álbmotjienasteamis, dadjá Sjåstad.
Finnmárkku ja Nordlándda fylkkat vuostá
Runar Sjåstad dadjá ahte go juo fylkkadikki mearrádus lea ahte Finnmárku galgá bissut sierra regiovdnan, de berrejit eiseválddit dárkilit guorahallat ja árvvoštallat ovdal go maidege mearridit. Son čujuha dasa ahte maiddái Nordlándda fylkkadiggi lea cealkán ahte sii áigot bissut sierra regiovdnan nu movt dál.
– Romssa fylka leages cealkán ahte sii áigot čađahit ránnjáságastallamiid, ja dan sii gal eai hilggo, dadjá Sjåstad.
Son dadjá ahte fylkadikki árvvoštallama vuođul daddjo ahte stuorra regiovnnain ii oro suohkaniid ja fylkkaid ekonomiija buorráneamen, ja danne lea Finnmárkku fylkkadiggi vuostálastán ovttastahttinplánaid.
Ii eanet fápmu
– Jus šattašii stuorit regiovdnan, ammahal dalle dát guovllu šattašii oalle fámolaš luondduvalljodagaid dáfus?
– Dán guovllus gal leat dál ollu luondduvalljodagat, vástida Sjåstand, gii ii jáhke ahte dát guovlu oččošii eanet politihkalaš váikkuhanfámu vaikko vel šattašiige stuorit regiovdnan.
– Politihkas ja politihka ovdánahttimis lea olmmošlohku mii mearrida. Dát mearkkaša ahte oktasaš Davvi-Norga šattašii stuorimus guovlun eanangáhppálaga dáfus, muhto smávva guovlun olmmošlogu dáfus, dadjá Runar Sjåstad,
Son ii loga guovllu rájáid sirdin dagahit eanet fámu, jus dat leaš dat mii lea ráđđehusa ulbmil suohkaniid ja fylkkaid ovttastahttimis.
