– «Koru» lea erenoamáš smarfehápmi. Dát lea árbevirolaš maori design. Koru boahtá ovtta muoras mas leat silbalasttat. Go dát urbbe, de lasta šaddá smarferiekkisin.
Nu muitala Isabella Parkinson čájehettiin iežas dáidaga, go NRK deaivvada suinna Ođđa-Selánddas.
Su dáidda lea gieskat addojuvvon skeaŋkan. Dat geavai stuorra konferánssa oktavuođas, mii lágiduvvui maori-universitehtas.
Luondu dat movttiidahttá Isabella Parkinsona. Lea bajásšaddán mearragáttis, smávit báikkis.
– Dát leat skálžžut. Go daid vuoššá ja váldá rihpu olggos, de dat leat maiddái «koru» hámis, čilge ja čájeha.
- Loga maiddái: Dolgevuogga lea dáidda
Gillán lohkan- ja čállinváttisvuođaiguin
Isabella Parkinsona skuvlavázzin ii leamaš nu álki.
– Mus leat lohkan- ja čállinváttisvuođat. Dáidda lea šaddan mu vuohkin muitalit máidnasiid čállima haga, dovddasta NRK:i.
Imaš dáidá gehččiide, ahte su dáidagis ii gávdno namma. Son ii vuolláičále dáidagiidda, nugo eará dáiddárat dávjá dahket.
– Mun in bija iežan nama dáidagii. Mu dáidagis leat muitalusat mat eai gula munnje. Mun lean gal devdnen daid, muhto muitalusat gullet mu álbmogii.
Ballá dáidda suoláduvvot
Nuppe beale máilmmi, de leat Kárášjoga dáiddaskuvlla studeanttat seammá áiggis oahppamin sárgut ámadajuid.
Dáiddaskuvllas hálešta NRK earret eará ohppiin, Ragnhild Nystadain.
Son dadjá iežas áddemin manin Isabella Parkinson hábme iežas dáidaga nama haga. Nystad liikkáge binnáš fuolastuvvá das.
– Dát lea buorre jurdda. Son háliida iežas álbmoga ovddidit.
– Dáđi bahát mun balan ahte jus lea čeahpes dáiddár, de muhtin suola sáhttá lohkat dat lea su dáidda. Hui ollu eamiálbmotdáidagis ii čuoččo namma, dadjá Ragnhild Nystad.
- Loga maiddái: Čájáhus goddon eamiálbmotnissoniidda gudnin
Maori-dáidda Sápmái?
Ođđa-Selánddas lea Isabella Parkinson sárgumin iežas jáhka. Jos dan áigo giige suoládit, de ferte olles jáhka suoládit.
– Boahtte háve go bisánan, de sáhtán jáhkas joatkit iežan dáidagiin, muitala Isabella Parkinson.
Hás it goasnu beasa su dáidaga oaidnit Sámis, boahtteáiggis.