Hopp til innhold

Bálkkašupmi nuorra duostilis boazoeaiggádii

Oarje-Finnmárkku Fálá orohaga boazoeaiggát, Jovsset Ante Sara (24), oažžu dán jagi Tsumbaráigi nammasaš bálkkašumi. Bálkkašumi oažžu Sara duostilvuođas ovddas maŋŋil go Stáhta mearridii ahte son bákkus galggai geahpidit boazologus.

Jovssegt Ante Sara

Jovsset Ante Sára oažžu dán jagi Tsumbaráigi bálkkašumi go lei nu duostil ahte guoddalii stáhta boazogeahpidanmearrádusa.

Foto: Matti Aikio

Ákkastallamis manin son galggai oažžut dán jagi bálkkašumi lea dat go son ii vuollánan stáhta geahpidanmearrádusain, ja baicca mearridii guoddalit Norgga Stáhta, ja vuittii vel. Bálkkašupmi lea juhkkojuvvon 2012 rájes, ja juhkkojuvvo olbmuide geat iešguđetge ládje lea hástalan fápmobeali.

Sisabáhkkemat

– Boazoealáhus ii leat goassege vásihan nu ollu ealáhussii váikkuheaddji sisabahkkemiid go maid dál šaddá gierdat. Nu čállá artista, Max Mackhé, guhte juohká Tsumbaráigi bálkkašumi.

Mackhé namuha preassadieđáhusastis muhtun sisabáhkkemiid maid boazoealáhus šaddá gierdat, ja geassá ovdan leat industriijadoaimmaid, ruvkedoaimmaid, bartahuksemiid ja mátkeealáhusdoaimmaid. Dáid doaimmaide de geavahuvvojit ollu návccat, dadjá Max Mackhé.

10-duhát ruvdnosaš vuoitu

Sii geat dán rádjai leat ožžon dán bálkkašumi leat Marie Persson jagi 2012, Anders Sunna jagi 2013, Jenny Laiti jagi 2014. Diibmá oaččui Sara Marielle Gaup Beaska dán bálkkašupmi. Bálkkašumi sturrodat lea 10 000 norgga ruvnno.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.