Hopp til innhold

Bajásšaddan luđiin

Sámi Grand Prix luohtevuoiti muitala iežas bajásšaddan luohtebirrasis. Dál lea giitevaš go son mánnán juo oahpai juoigankoanstta, dál son nuppes juo vuoitá sámi Grand Prix juoigangilvvu

 

Ánne Biret Peltopera
Foto: Nrk Sami Radio / NRK

Ánne Biret Peltopera dat vuoittii dán jagi Sámi Grand Prix juogangilvvu. Iežas muitala lea luođi lean juo diibmá ráhkadan, nu ahte dan lei beare sáddet gilvui. Son lei gal eará maid dán jagi ráhkadan, muhto dan son bijai iežas oappá juoigat, ja son šattai goalmmádin luohtegilvvus.

 

Luođit vulget goarodettiin

 

 

Ánne Biret Peltopera
Foto: Nrk Sami Radio / NRK

Ánne Biret Peltopera muitala iežas fuomášit luđiid go lea goarrumin goarronmášiinnain. Mášinjietna dat hápme luđiid, nu son dušše dájáhusaid vel gávdná. Go de sus leat luođit gárvá, de skeŋke son daid daidda geasa su mielas orrot dat heivemin.

 

Juoigan mánnávuođa rájes

Sin ruovttus leat sii álo juoiggadan, sii leat čieža oappáža, ja sii leat buohkat luođi gullan mánnán juo. Ánne Biret Peltopera lea giitevaš go sii leat leamaš nu lihkkui ahte leat beasssan oahppat juoigama juo mánnán.

Gula jearahallama Ánne Biret Peltoperain

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.