NRK Meny
Normal

Báikkálaš searvvit behtohallan bieggamilluid huksenplánain

Rásttigáissá guvlui leat Vindkraft Nord fitnodat plánen hukset stuorra bieggamillo párkka, ja fitnodat lei bivdán ahte sin lánat eai galgan almmuhuvvot almmolašvuhtii. Dál báikkálaš searvvit cuiggodit fitnodaga ja sin plánaid go easka mediaid bakte gullet huksenplánaid birra.

Rásttigáisá

Rásttigáisá lea sámi bassi várri, gosa Vindkraft Nord fitnodat pláne hukset bieggamilluid.

Foto: Stian Strøm

Sirpmá Falástallansearvvi ja gilisearvvis eai lean gullan maide dáid plánaid birra, ovdalgo medias almmuhuvvojedje dieđut. Sirpmá gilisearvvi jođiheaddji, Britt Hjørdis Somby, lohka plánaid garrasit guoskat ja čuohcat sidjiide geat guovllu geavahit.

Eai leat nu čábbát

Somby dadjá ahte bieggamillot eai gal čábbut guovllus, ja dadjá ahte dat baicca billistit guovllu buhtes luonddu jus dien guvlui fitnodat pláne hukset bieggamilluid.

─ Sidjiide gal lea dehálaš bisuhit luonddu nu movt dál lea Rásttigáissá guovllus, danin go eai leat šat nu galli guovllus ahte gávdná juste dan luondduhámi mii juste dien guovllus lea, dadjá Britt Hjørdis Somby.

  • Guldal jearahallama Britt Hjørdis Sombyn dás:

Ii duoddarii gal

Ii got livčče buoret hukset bieggamilluid ovdalii jogaid ja eanuid dulvadit?

─ Máŋgga dáfus gal dat livččii dat vuohkkaset, muhto manin jura min duoddariidda. Nu jearrala Sirpmá gilisearvvi jođiheaddji, Brit Hjørdis Somby, ja dadjá ahte livččii lunddoleappot diekkár bieggamilluid hukset mearaguovllus ovdalii guovdu duoddara.

Luottaid hukset

─ Nubbe eará maid mii goit jearrat, dat lea movt dien báikái jurddašit johtit jus juo huksejit dien plánejuvvon bieggamillo párkka. Nu jerret báikki olbmot, dadjá Guttorm Somby.

Jus diet bieggamillut galget huksejuvvot, ammahal dalle dáidet šaddat luottaid dohko hukset. Dákákr luottaid dáidet šaddat hukset Leavvajogas bajás Rástigáisái, mii gal billista luonddu vel eanet, dadjá gilisearvvi jođiheaddji, Brit Hjørdis Somby.

Unohis bargovuohki

Britt Hjørdis Somby atná unohassan go báikkálaš searvvit eai leat beassan oainnuset buktit dáid plánaide, ja velá dasa jus juo šaddet maiddái luottaid hukset huksenbáikái.

Somby atná váidalahttin ahte báikkálaš searvvit, geat galget báikkálaš beroštumiid ovddastit, eai beasa áššái cealkit maide ja dušše mediaid bakte gullat plánaid birra.