Hopp til innhold

Báikkálaš berošteaddjit

Odne rahpui Olmmáivákki dáiddára Gjert Rognli dáiddáčájáhus "Várit leat seammát". Moaddelogis ledje boahtán Rognli dáidága vásihit.

"Várit leat seammát"
Foto: Klemet Anders Sara / NRK-Sápmi

Eanaš dáidáberošteaddjit ledje Gáivuotnalaččat. Dáppe besse vásihit Rognli dáidágiid "Várit leat seammát", govvejuvvon govaid.

Dáiddár duhtavaš

Gjert Rognli

Gáivuona dáiddár Gjert Rognli lei ilus go nu máŋggas bohte su dáiddá rahpandoaluide odne Olmmáivákkis.

Foto: Klemet Anders Sara / NRK-Sápmi

Dáiddár Gjert Rognli lohká iežas duhtavažžan go ná olu berošteaddji bohte rahpandoaluide.

Korte nyheter

  • Angelique Kidjo Riddu Riđđui

    Máilmmi beakkán lávlu Angelique Kidjo, boahtá Olmmáivággái dán geasi. Oarje-Afrihká artistta lávlu suoidnemanus Riddu Riđu lávddis ja festivála lágideaddjit leat rápmásat go leat su ožžon festiválii.
    Angelique Kidjo seaguha árbevirolaš Afrihká-šuoŋaid ja Eurohpá, Brasila ja Karibia musihka.
    Kidjo vuittii Amerihká Grammy-musihkkabálkkašumi iežas maŋemuš skearruin "Mother Nature". Muđui bohtet artisttat nugo The Halluci Nation, maiddái popčottalávllaartistta Riit Nunavutas eret, Sámi Grand Prix-oasseváldiid SOÁ ja afrocolombialaš Lido Pimienta, leat muhtin dán jagaš Riddu riđu artisttain.

    Festiválajođiheaddji Sandra Márjá West lea rámis festiválaprográmmain: "Lea hui buorre beassat ráhkadit Riddu Riđđu nugo láve leat, gussiiguin mat bohtet sihke guhkkin ja lahka.
    –Mun illudan gullat váriid dávisteame luđiide ja čottalávlagiidda, ja campas oaidnit go guossit ija miehtá dolastit, lohká West
    Festiválas fáddán dán jagi lea Vuoigatvuohta eatnamiidda ja dat vuhtto miehtá festivála. Nugo dáiddačájáhusain Binnáš vel! Mii guovdilastá sisabahkkemiid eamiálbmoteatnamiidda, ja čohkke dáiddáriid Kalaallit Nunaatas ja Sámis.

    Angelique Kidjo på Riddu
    Foto: Nareas Sae-Khow
  • Dáhttot bivdiid várrugasat fierbmut

    Guolástusdirektoráhta mearrabálvalus lea registreren ahte guollefatnasiin leamaš stuorra earri gonagasreabbá oalgebivdun, sin njáŋggofirpmiin Finnmárkkus. Nu čállá direktoráhta Twitteris. Mearrabálvalusa bealis dáhttot buohkaid geat dál áigot bivdit Finnmárkkuvuonain, iskat firpmiid bidjat várrugasat vai gonagasreabbá ii čáŋašii dohko.

    Kongekrabbe i garn
    Foto: Jon Are Nilsen / NRK
  • Áittan buot julevsámegielagiidda go oahpaheaddjit váilot

    Ájluovttas skuvllas, Hápmira suohkanis, ballet váhnemat ja oahpaheaddjit, ahte muhtin oahppit masset sámegiel oahpahusa čakčat. Ohcanáigemearri guovtti julevsámi oahpaheaddjevirgái dievvá dán vahkus, ja dán rádjai ii leat oktage ohcan dáid virggiide.
    Oahpaheddjiid luohttámušolmmoš Marita Mikkelsen dadjá ahte nuoramus ohppiin geain lea julevsámegiella vuosttaš giellan, sidjiide lea dehálaš addit báikkálaš oahpahusa. Muhto muđui gal šaddet vuoruhit guhte oahppit ožžot báikkálaš oahpahusa, ja guhte oahppit ges gáiddusoahpahusa. Jus julevsámi oahpaheddjiid dilli ii buorrán, de ballá Mikkelsen ahte boahtteáiggis fertejit heaittihit julevsámegiel oahpahusa Ájluovttas.
    – Dan ii sáhte čilget sániiguin, go dat lea áittan buot julevsámegielagiidda. Livččii tragediija min gillii ja kultuvrii, dadjá Marita Mikkelsen:
    Suohkan ii háliit kommenteret ášši vuos, muhto dadjet ahte sii váldet ášši duođalaččat, go dihtet man váttis dat lea gávdnat julevsámi oahpaheddjiid.