Sámi digitála vuorkáneahttasiidu rahppon

Dál sáhtát ohcat govaid dahje dieđuid vaikke du soga birra, sámi servodaga, kultuvrra dahje sámehistorjjá birra. Go dál lea rahppon oktasaš sámi digitála vuorkáneahttasiidu «Nuohtti». Doppe buohkat besset ohcat govaid ja materiálaid mat láktasit sápmelaččaide miehtá Eurohpa.

32 vuorkká, girjeráju ja musea miehtá Eurohpa leat buktán materiálaid neahttasiidui, mii lea ovttasbargu Norgga, Ruoŧa ja Suoma Riikavuorkkáin ja Norgga ja Suoma Sámi vuorkkáin.

Davvisámegillii dubbejuvvon animašuvdna dál Netflixas

Netflix rávdnjenbálvalusas gávdno dál sámegiel animašuvdnafilbma. Studio Ghibli filmma «Chihiro ilmmiid gaskkas» sáhttá dál geahččat Netflixas sihke davvisámegielat dubbemiin ja tekstemiin. Sámi filbmainstituhtas illudit ja árvalit, ahte boahtteáiggis šaddá álkit fidnet sámegiel filmmaid dán bivnnuhis rávdnjenbálvalussii. Nu čállá Yle Sápmi.

Badjel 11.000 olbmo duššan

Dassážii leat badjel 11.000 olbmo duođaštuvvon jápmán eanadoarggástusas Durkkas ja Syrias, dieđiha AFP ođasdoaimmahat.

Durkkas lea 8.574 duođaštuvvon jápmán, dieđihii presideanta Recep Tayyip Erdogan ovdalgaskabeaivve gaskavahko.

Syrias lea dássážii dieđihuvvon badjel 2.600 olbmo duššan.

Máilmmi dearvvašvuođaorganisašuvnnas (WHO) ballet ollu eanet olbmot leat duššan, sii meroštit birrasiid 20.000 olbmo jápmán.

Máŋga duhát olbmo leat roasmmohuvvan ja ii leat dihtosis man olus leat moallanan visttiid vuolde. Danne jáhkkimisge jápminlohku lassána dađis go gádjunveagat gerget ohcamis visttiin olbmuid.