– Baikajohka gal lea mearehis fasttes namma

– Dát gal lea njuolgut dušši. Dán gilis oainnat eai ása galle sápmelačča. Ruoŧa sápmelaččat dat bukte sámegiel nama dán báikái ovdal soađi. Eaige sii geat ásset dáppe leat dás gullan maidege ovdalgo gieskat čálligohte áviissain dán birra, lohká Halvard Nilsen (74).

Eallilan baikajohkalaš geavaha garra sániid go hállá Skittenelv sámegiel báikenama birra. Dás eat leat čállán garrusániid maid son geavaha.

– Mu mielas lea áibbas endorii. Dán báikki namma lea Skittenelv! Iige mihkkige eará, deattuha son.

– «Dirty River»

Idjadansaji eaiggát, Vigdis Svelarud, ii gal loga iežas suorganit go su ruovttubáikái fargga ihtá sámegielnamma maid.

– Áibbas ortnegis, oaivvilda Svelarud.

– Baikajohka šaddá «Bæsjelva», jus dan jorgala dárogillii. Maid dasa dajat?

– Dáppe lávejit olu leaikkastallat Skittenelv namain. Nuoraidviesus lei moatti jagi áigi sketša mas báiki gohčoduvvui ruoŧagillii «Smutsiga floden» ja eaŋgalasgillii «Dirty River». Na manna bat ii?, jearrá Svelarud.

Eallilan baikajohkalaš ges dadjá dán:

– Jallodat! Njuolgut jallodat! Dat lea áidna maid dása sáhtán dadjat.

Gáisi giellaguovddáš ovttasráđiid Sámedikki báikenammanevvohagain leat gávdnan ja dárkkistan sámegiel báikenamaid.

Árbevirolaš sámi ássanguovlu

Romssa kultur- ja valáštallanhoavda Lisa Hoen lohká iežas ollásit luohttit dan bargui mii lea dahkkon.

– Sii leat válljen namaid mat leamaš dahje leat ain geavahusas, eaige leat jorgaluvvon. Sámedikki báikenammanevvohat lea válljen doalahit namaid maiddái maŋŋágo dat leat leamaš gulaskuddamis. Danne navddán Sámediggi lea dárkkistan namaid, lohká Hoen.

Hoen lohká Romssa suohkana dál garrasit bargamin čalmmustahttit sihke sámi báikenamaid, sámegiela ja dan ealli sámi kultuvrra mii lea guovllus.

– Romsa lea árbevirolaš sámi ássanguovlu ja dáppe orrut ain olu sápmelaččat. Dasa lassin leat olu sápmelaččat geat fárrejit deikke. Danne lea Romsa dál Sámedikki jienastuslogu mielde Norgga stuorámus sámi gávpot, čilge Hoen.

19 báikenama

Stuorámus sámi gávpot lea viimmat dohkkehan iežas sámegiel nama. Seammás leat 18 eará sámegiel báikenama Romssa suohkanis dohkkehuvvon.

Sámediggi lea dál dohkkehan sámegiel báikenamaid ja mo daid galggašii čállit:

• Romsa – Tromsø by
• Guohcavuopmi – Breivikeidet
• Árbi – Brattfjell
• Leaibbáš – Oldervik
• Čievra – Skotsætet
• Snárdut – Snarby
• Baikajohka – Skittenelv
• Skearronjárga – Vågnes
• Biežavággi – Kroken
• Suortu – Stordalstrand
• Čuoikavárri – Hundbergan
• Vávrrosnjárga – Fagernes
• Skáidi – Sakariasjord
• Nieidavuovdi – Andersdal
• Leaibedievvá – Olderbakken
• Moskaluokta – Lakselvbukt
• Skárramohkki – Skarmunken
• Várpenjárga – Sjursnes
• Lánjluokta – Leirbukt