NRK Meny
Normal

Báhkka buktá hástalusaid

Dábálaš láve arvedálki leat hástalussan Riddu Riđđu festiválas. Dán jagi dagaha báhkka erenoamaš hástálusaid mánáidfestiválii.

Riddu Riđđu

Mánát ferteje čáhcerišánis čuččodit vuoi eai báhkkan.

Foto: Klemet Anders Sara / NRK

Ii goassege leat leamaš ná báhkka Riddu Riđđu festiválas go dán jagi, lagábui 30 lieggaceahki odne.

Čáhcerišán mánáide

Kirsti Lervoll måtte ta frem sommerkjolen i varmen

Geassebáhkka buktá hástalusaid festiválahasaide. Festiválajođiheaddji Kirsti Lervoll gal maid fertii geassebiktasiid coggalit go nu báhkka.

Foto: Klemet Anders Sara / NRK-Sapmi

Festiválii dagahii dát liige hástalusaid mánáidfestiválii.

– Leat čuožžilan váttisvuođat mat eai leat mis ovdal leamaš, go leat earret eará šaddan bidját čáhcerišana festivála gieddái mánáide, muitala jođiheaddji, Kirsti Lervoll.

23. geardde

Riddu Riđđu festivála lágiduvvo dál 23. geardde ja festiválajođiheaddji lohká dál gearggusin váldit vuostá olbmuid go dál festivála rahppo otne eahkes diibmu beal čiežas.

– Mii leat vuovdán buot billeahtaid maid leimmet mearridan ovdalgihtii vuovdit, ja go ná čáppa dálki, de vuordit ollu olbmuid, lohká Kirsti Lervoll.

Vaikko lei báhkka, de lei mánáid mielas suohtas mánáidfestiválas mii álggii juo gaskavahkku ja bistá bearjadahkii.

Riddu Riđđu 2014

Vaikko lea báhkka, de lea mánáid mielas suohtas leat mielde Riddu Riđu mánáidfestiválas.

Foto: Klemet Anders Sara / NRK