Hopp til innhold

Bággii iežas oahppat sámegiela

– Lei issoras go ii ádden maid buohcit ja boarrásat hálle, danne fertii bágget iežas oahppat sámegiela, nu muitala Kari Kørner Balto, gii bođii Kárášjohkii buohccedivššárin 1960:s.

Kari Kørner Balto

Kari Kørner Balto muitala mo son oahpai sámegiela. Bággu lei oahppat og ii áddehallan buhcciiguin ja boarrásiiguin. Sii hálle dušše sámegiela dalle og son álggii Kárášjohkii buohccedivššárbargui 1960:s.

Foto: Anne Olli / NRK

Kari Kørner Balto muitala iežas ráđehuvvan áibbas, go ii áddehallan buhcciiguin ja boarrásiiguin Sámemišuvnna buohcciid- ja boarrásiidsiiddas. Buoremussan gávnnahii Kari oahppagoahtit sámegielsániid. Juohke sáni maid oahpai čálistii alcces báhpárii mii sus juo lei sadjosis lumas. Nie son oahpai sániid das beaivválaš barggus.

Biibbalat dáro- ja sámegillii ledje su oahppogirjjit

Iežas muitala hálidan oahppat sámegiela, muhto ii barggu oktavuođas lean vejolaš lohkat sámegiela. Su buoremus oahpponeavvu lei Biibbal. Friddjaáiggis ja idjabargguid áigge vieččai son sihke dáru ja sámi Biibbala ja guorahalai sániid. Eai dan áigge lean sátnegirjjit main sáhtii ohcalit sániid.

– Biibbal lei dat oahpponeavvu mii sus lei. Son dovddai teavsttaid danne go lei lohkan Biibbala, de dalle diđii makkár teavsttas gávnnai sániid maid dárbbašii oahppat sámegillii. Ja go daid gávnnai, de lei beare ohcalit sámegiel Biibbalis seamma teavsttas. Nie son nagadii čohkket dan mađe olu sániid sámegillii ahte gulahallagođii buhcciiguin ja boarrásiiguin, muitala son.

Kari Kørner Balto barggai maid dearvvasvuođabuohccedivššárin moadde áigodaga. Dan barggus dárbbašii maid máhttit sámegiela, vaikke dalle gal juo ledje nuorat vánhemat hállagoahtán dárogiela.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.