NRK Meny
Normal

Bággejuvvot ja bággehallat

Muhtumin sáhttit ribahit seaguhit passiivahámiid, ja de ráhkadat dakkár hámiid mat eai leat goassege gullon árbevirolaš sámegielas.

Seaguhushámit

Dakkáraš vearbahámit go (sii) bággehallojuvvojit, (sii) gáržžohallojuvvot sáhttet muhtumin gullostit, ja prof. Pekka Sammallahti dadjáge ahte “dákkár passiivavearbbat eai leat goassege gullon árbevirolaš sámegielas, muhto dat leat várra mearkan das, ahte passiivavearbasystema lea moivašuvvamin, go dat lea nu earálágan go omd. dárogielas. Duoidda ovdamearkavearbbaide leat sehkkejuvvon oktii guokte passiivatiippa main lea gielas goappásge iežas ulbmil:

a) Bággejuvvot (neutrála passiiva mii almmuha, ahte soamis ollašuhttá dilálašvuođa man birra vearba muitala / man vearba ásaha)

b) Bággehallat (bággen dáhpáhuvvá dan olbmo vuordámušaid dahje sávaldagaid vuostá gean soamis bágge; ng. adversatiiva passiiva).”

Son ii bággejuvvon

Dát guokte ovdamearkka čájehit ahte 1) lea neutrála ja 2) ii leat neutrála:

1) Muhto ii oppa Titus ge, gii lei mu fárus, bággejuvvon birračuohpahuvvot vaikko son lei greikalaš (Biibal, Gal 2, 3).

2) Min máttut muitaledje mo sii bissofámuin bággehalle guođđit sullo, ja doppe lea roggi gos leat ain sin dávttit...(http://www.galdu.org/web/calahus.php?odas=385&giella1=sam).

Sivile på flukt fra israelske angrep i Libanon
Foto: Shannon Stapleton / Scanpix/Reuters

Sojahanminsttar

Mearkkašan veara lea ahte bággejuvvot-vearba sodjá seamma minstara mielde go diŋgot-vearba  ja bággehallat-vearba gis seamma láhkai go ballat-vearba.

Bovdehallat vai bovdejuvvot

Bajábeale čilgehusa mielde sáhtášii maid jurddašit ahte vearbbaid bovdejuvvot ja bovdehallat gaskkas lea erohus.  Mo don orot dovdamin go bovdehalat itge bovdejuvvo heajaide?