Sámi báikenamat leat dehálaččat, go dain leat sámi historjjálaš kulturmuittut.
– Lea leamaš dakkár ipmárdus ahte sámi namat leat dušše mehciin, muhto Tromssa Nordlándda guovllus bohtet dál eambbo báikenamat maid, dadjá Kártadoaimmahaga bargi Aud Kirsti Pedersen.
Go meahcis galgá dádjadit
Máret Rávdná Buljo Guovdageainnus náitalii Lodegii Nordlándii, ja sin bearaš bargá bohccuiguin. Son dadjá leat dehálažžan diehtit sámi báikenamaid, earenoamážit go meahci vánddarda. Sáhttá bártidit jus ii ipmir mearkkašumi muhtin namas.
– Ovdamearkan nama «Jufttavuomi», mii davvisámegillii lea «Doaresvuopmi». Dakko ii beasa, ja ealuin ferte mannat birra. Garvit dan báikki, dadjá son.
Mánáide ferte daid oahpahit, danne go fertejit máhttit dádjadit meahcis, ja ipmirdit gokko lea manahahtti ja gokko ii leat, oaivvilda Buljo.
– Danne ja gullevašvuođa dihte leat báikenamat dehálaččat, eai ge dušše giellagáhttema dihte.
Nuortalaš báikenamat
Mátta-Várjjagis leat nuortalaš báikenamat. 2017:s rievdadedje láhkanjuolggadusa, ja nu šattai lohpi registreret dahje čállit báikenamaid maid nuortalašgillii. Ovdal daid šadde čállit davvisámegillii.
Kártadoaimmahat lea atnigoahtán sámi báikenamaid. Ja dál leat badjelaš 600 nama sihke julev-, nuortalaš.- ja oarjelsámegillii dohkkehuvvon. Go láhkanjuolggadus bođii, de šattai lohpi maid nuortalašgillii čállit báikenamaid. Daid lávejedje ovdal fertet čállit davvisámegillii.