NRK Meny
Normal

Badjel 400 joatkkaskuvlla oahppi skuvlasáhtu haga

Finnmárkku Fylkkadikki ekonomiijaplána meannudeami oktavuođas, de fylkkaráđđeolmmái árvalii viiddidit nuvttá skuvlasáhtu ráji joatkkaskuvlla ohppiide. Fylkadiggi bivddii ráđđeolbmá čielggadit váikkuhusaid rievdadeamis.

Sammenslåing av fylkeskommuner

Finnmárkku fylkkapolitihkkarat šaddet mearridit galget go čuovvolit fylkkaráđđeolbmá árvalusa ahte sihkástit nuvttá skuvlasáhtu badjel 400 joatkkaskuvllaohppiide fylkkas, ruhtaseastima dihte.

Fylkkaráđđeolmmái čállá čilgehusastis ahte eará guovlluin Norggas lea nu ahte oahppit geat orrot badjel 6 km eret skuvllas ožžot nuvttá skuvlasáhtu. Finnmárkkus lea dát rádji 4 km. Duogáš árvalussii lea ahte Fylkkasuohkan galgá seastit ruđaid, oktiibuot 7,7 miljovnna ruvnno.

Spiehkasta riikkadási unnimusgáibádusas

Dálá skuvlasáhtu rádji mii lea 4 km, spiehkasta oahpahuslága vuolimus gáibádusas mii lea nuvttá skuvlasáhttu ohppiide geat orrot guhkkelis go 6 km eret skuvllas.

Jus dál rievdadit dien ráji, de fylkkaráđđeolmmái čállá ahte Fylkkasuohkan seasttášii 7,7 miljovnna ruvnno. Dát rievdadus guoská oktiibuot 405 ohppiide Finnmárkkus.

Válljet eará sáhtu

Jus fylkkaráđđealbmá árvalus mearriduvvo de dat mielddisbuktá ahte oahppit geat orrot lagat go 6 km skuvllas, šaddet válljet molssaevttolaš skuvlasáhtu. Joatkkaskuvlla oahppit šaddet oastit sierra sáhttogoarta mii lea gaskal 12 ja 19 jahkásaš nuoraide, ja máksá 250 ruvnno mánnui.

UNG nammasaš Finnmárkku goarttain besset gaskal 12 ja 25 ahkásaš nuorat ja vearjogeatnegas soalddáhat nuvttá mátkkoštit miehta fylkka.